Ǵalymjan Esenov Jusan Bank-tiń iri aksıoneri jáne Qazaqstandaǵy eń baı bıznesmenderdiń biri, uıaly baılanys operatory «Ksell» AQ aksıalar paketiniń bir bóligin óziniń jeke kompanıasyna satqan, dep habarlaıdy aqshamnews.kz.
12 qyrkúıekte KASE saıtynda jarıalanǵan aqparatqa sáıkes, úsh kún buryn «Ksell» uıaly baılanys operatorynyń aksıonerler quramynda ózgerister bolǵan. Aksıalar paketin Ǵalymjan Esenov satqan, al olardy KC Holding Ltd jeke kompanıasy satyp alǵan. Bul mámile Esenov tobynyń kompanıalary arasyndaǵy aksıalardy tıimdi bólý qurylymyn ońtaılandyrý maqsatynda júzege asyrylǵan. Sondyqtan aqyrǵy benefısıar ózgerissiz qaldy.
«Qazirgi ýaqytta «Ksell» AQ aksıonerleri, kompanıanyń on paıyz jáne odan joǵary daýys beretin aksıalaryna ıe: 51%-y «Qazaqtelekom» AQ-qa, al 14,87%-y jeke kompanıa KC Holding Ltd-ke tıesili. Bul ózgerister kompanıanyń operasıalyq qyzmetine áser etpeıdi», — delingen KASE habarlamasynda.
KC Holding Ltd kompanıasy Ǵalymjan Esenovke tıesili, sondyqtan is júzinde bıznesmen aksıalardy ózine-ózi satqan bolyp shyǵady.