Ult ustazynyń 150 jyldyǵynda kópti qýantqan jańalyqty ahmettanýshy ǵalymdar súıinshileı habarlady.
Alash ardaqtysy Ahmet Baıtursynulynyń dombyrasy tabyldy, dep habarlaıdy Almaty-akshamy.kz Almaty arnasyna silteme jasap.
Ult ustazynyń 150 jyldyǵynda kópti qýantqan jańalyqty ahmettanýshy ǵalymdar súıinshileı habarlap otyr. Onyń ústine bul aqjoltaı aqpardyń ulttyq dombyra kúnimen tuspa-tus kelgeni taǵy bar.
Baıtursynulynan jetken baǵaly muralardyń qatary kóp emes. Aǵartýshy atynda murajaı-úı bolǵanymen, ondaǵy tek sanaýly eksponattyń Ahmet dáýirinen jetkeni kópke málim. Áýeli ahmettanýshylardy, keıinnen kúlli qazaqty qýantqan qara dombyra buǵan deıin qoldan qolǵa ótip, saqtalyp kelipti. Endigide Ahańnyń ózi ustap, kózi kórdi degen azyn-aýlaq muranyń qatary onyń qoly tıgen dombyrasymen tolyqpaq.
«Ahmettiń týystary sol dombyrany da saqtaýǵa qoryqqan ǵoı negizi. Sóıtip, bir qoldan ekinshi qolǵa ótip ketken. Negizi jıeninde bolǵan, Ahmettiń qaryndasy Zeıláshtan týǵan Bákibaı aǵaı Beıisovter otbasy kúni keshege deıin saqtap kelgen de, keıin1956 jyly qaıtadan bul kisilerdiń sońyna túse bastaǵan kezde, ózderinen týǵan jıensharǵa berip jibergen eken. Qaıta qalpyna keltirgennen keıin myna 150 jyldyqtaǵy úlken bir tosyn ári tartý syıymyz sol Ahmettiń qoly tıgen dombyra bolady», – dedi ahmettanýshy, Ahmet Baıtursynuly mýzeı-úıiniń jetekshisi Raıhan Imahanbet.
Qundy jádiger Ahań ómirden ótken 85 jylda ár adamnyń amanat etip tapsyrýymen búginge jetip otyr. Ázirge dombyraǵa qatysty tolyq aqpar joq. Bet qaqpaǵy búlinip, qulaq, ishegi joǵalǵan eken. Mura mamandar qolynan ótip, qaıta qalpyna keltiriledi. Sodan soń kóptiń nazaryna usynylmaq.