Búgin – qazaqtyń rýhanı kósemi, ult ustazy, qazaq tiliniń reformatory, kórnekti ǵalym, aqyn, aǵartýshy Ahmet Baıtursynulynyń týǵan kúni. Ahmet Baıtursynuly óziniń ǵumyryn qazaq ultynyń bilimin kóterýge, tilin saqtaýǵa jáne ony damytýǵa arnaǵan tulǵa. Onyń eńbegi búgingi urpaq úshin altyn mura bolyp qaldy.
Ult jumysy – úlken jumys: Úlken jumysqa kóp jumysker kerek.
***
Adamǵa eń qymbat nárse – jurt qamy, jurt isi.
***
El baǵatyndar – el baǵýlaryn jaqsy bilýleri kerek.
***
Bilimdi bolýǵa – oqý, baı bolýǵa –kásip, kúshti bolýǵa – birlik kerek.
***
Ult namysy degendi qazaqtyń kóbi – eki aýyldyń, eki toptyń ıa eki rýdyń namysy dep uǵady: basqadan kemshilik kórse – namystanbaıdy, kektemeıdi; bir-birinen kemshilik kórse – kegin jibermeıdi.
***
Balam degen jurt bolmasa – jurtym degen bala qaıdan shyqsyn.
***
Elde joq rýh – aqyn sózine qaıdan kelsin?!
***
Oqýsyz halyq qansha baı bolsa da – biraz jyldardan keıin onyń baılyǵy ónerli halyqtardyń qolyna kóshedi.
***
Ultyn kerek qylyp, halyqqa qyzmet qylamyn degen qazaq balalary qazaq jumysyna qolynan kelgenshe qarap turmaı kirisip isteı berse – uly jumysy ulǵaıyp tolyqpaqshy.
***
Qazaqtyń bas adamdary! Áýeli sizder adaspańyzdar: adaspas úshin aqyldasyp, oılanyp, yntymaqpen is etińder.
***
Alashqa aty shyqqan adamdar! Kósemdikterińdi adaspaı túzý isteńder! Sender adassańdar – arttaryńnan alash adasady: arttaryńnan ergenderdiń obal-saýabyna sizder qalasyzdar.