Maýsymaralyq kezeńde adamdardyń 80 paıyzynda dárýmen jetispeıdi – almatylyq sarapshy
Almaty qalasynyń Óńirlik komýnıkasıalar qyzmetinde ótken brıfıńte №26 emhananyń gerontolog dárigeri Svetlana Fazyljanova dárýmen jetispeýshiliginiń sebepteri, belgileri jáne avıtamınoz kezinde kezdesetin aýrýlar týraly aıtty.
Atap ótetini, avıtamınoz - adam aǵzasynda bir nemese dárýmender tobynyń jetispeýshiligi. Dárigerdiń aıtýynsha, jyl saıyn maýsymaralyq kezeńde adamdardyń 60-80%-y dárýmen jetispeýshigin sezinedi. Atalǵan aýrýǵa jetkiliksiz nazar aýdarý jáne ony elemeý kóbinese jaǵymsyz saldarǵa jáne jaǵdaıdyń nasharlaýyna ákeledi.
«Ár adamnyń aǵzasyna jeke qaraý kerek jáne ony dárýmenderdi tańdaǵan kezde de eskergen jón, mıneraldardy zattar men olardyń kólemi de soǵan qaraı taǵaıyndalady. Ártúrli patologıalarmen jáne aýyrǵan aýrýlardyń saldarynan dárýmen jetispeýshiligi birneshe ese artýy múmkin. Aıta keterligi, sýyq tıgen kezde aspırın qabyldaý aǵzadan S dárýmeniniń bóliný jyldamdyǵyn 3 esege arttyrady», - deıdi S.Fazyljanova.
Dárigerdiń aıtýynsha, avıtamınozdy atalǵan belgilerdiń negizinde anyqtaýǵa bolady:
– buryn janǵa rahat syılaıtyn zattar men áreketterge apatıa jáne qyzyǵýshylyqty joǵaltý;
– sýyq tıý men murynnyń bitýi turaqty serikterge aınalady;
– bir nemese birneshe sozylmaly aýrýlardyń órshýi
– uıyqtap ketý qıyn, al tańerteń orynnan turý odan da qıynyraq bolady;
– túngi 2:30 jáne 3:30 ýaqyt aralyǵynda jıi oıaný;
– teride bezeýdiń paıda bolýy nemese teriniń shamadan tys qurǵaýy;
– shashtyń synǵyshtyǵy jáne tyrnaqtardyń qatparlanýy;
– ish qatý, gastrıt túrinde asqazan-ishek joldarynyń buzylýynyń paıda bolýy;
– qyzylıektiń aıaqasty qanaýy;
– nazardy shoǵyrlandyra almaý;
– bastyń únemi aýyrýy;
– qulaqtyń shýlaýy jáne bastyń jeńil aınalýy.
Bul tizimdegi eki belginiń bolýy progresıvti kóktemgi avıtamınozmen jedel kúresý qajettigin kórsetedi, deıdi sarapshy.
Sondaı-aq, dárigerdiń aıtýynsha, jaǵymsyz belgiler kóbinese birneshe dárýmender men mıneraldardyń jetispeýshiliginiń nátıjesinen bolady.
«Kóktemgi avıtamınozben tıimdi kúresý úshin qazirgi ýaqytta aǵzaǵa qandaı dárýmender nemese olardyń kombınasıasy qajet ekenin anyqtaý mańyzdy. Kún saıyn jetispeıtin dárýmenniń naqty mólsherin toltyrýǵa tyryspaý kerek ekendigi dáleldendi. Onyń ornyna dárigerler qajetti dárýmender men mıneraldardyń ortasha mólsherin birneshe kún nemese apta ishinde alýǵa keńes beredi», - dep túsindirdi spıker.
Dárýmen tapshylyǵynyń aldyn alýdyń negizgi qaǵıdasy – durys jáne teńdestirilgen dıetany saqtaý. Sonymen qatar, dárýmen jetispeýshiligi kezinde taza aýada jıi serýendeý jáne turaqty sporttyq jattyǵýlar kómektesedi.
Dáriger tamaqtanýdyń negizgi erejelerin eleýsiz qaldyrmaýǵa jáne tamaqtaný rasıonyna jańa syǵylǵan shyryndardy, freshterdi, kókónisterdiń, jemisterdiń jáne kók shópterdiń ártúrliligin qosýdy usynady.
Sondaı-aq, maman dárýmenniń jetispeýin elemeý medısınalyq aralasýdy qajet etetin aýyr aýrýlarǵa, tipti aýrýhanaǵa jatqyzýǵa deıin aparatynyn eskertedi.