Agrobank qurý jónindegi usynys orynsyz. Bul týraly Májilis depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy Almaty-akshamy.kz.
«Ekonomıkanyń agrarlyq sektorynyń problemalaryn sheshý úshin memleket aýyl sharýashylyǵyn damytýdyń ornyqtylyǵyn arttyrýǵa baǵyttalǵan júıeli is-sharalar qabyldaýda. Máselen, jyl saıyn fermerler úshin kóktemgi egis jáne egin jınaý jumystaryn júrgizýge qarjy bólinedi. «Keń dala» baǵdarlamasy arqyly 140 mlrd teńge kóleminde jeńildetilgen kredıt beriledi. Aýyl sharýashylyǵy salasynyń negizgi kredıt berýshi uıymdary «Báıterek» holdıńiniń enshiles uıymdary «Agrarlyq nesıe korporasıasy» AQ jáne «QazAgroQarjy» AQ (lızıń) bolyp tabylady. 2023 jyly «Agrarlyq nesıe korporasıasy» AQ jelisi boıynsha 330,0 mlrd teńge kóleminde qarajat, onyń ishinde kóktemgi egis jumystaryna 140 mlrd teńge bólindi. Budan basqa, «QazAgroQarjy» AQ 2023 jylǵa arnalǵan aýyl sharýashylyǵy tehnıkasyn satyp alý jospary 170,0 mlrd teńgege deıin ulǵaıtyldy. Sondaı-aq jem-shóp daıyndaý tehnıkasy men sýarýdyń mobıldi júıelerin qarjylandyrý úshin 20,0 mlrd teńge mólsherinde búdjettik ınvestısıalar tartyldy», - dep atap ótedi Úkimet basshysy jaýabynda.
Premer-Mınıstr agroónerkásip kesheni AÓK sýbektilerine kredıt berýde jańa tásildemelerdi engizý boıynsha is-sharalar qabyldanyp jatqanyn aıtady.
«Memleket basshysynyń tapsyrmasy boıynsha «Aýyl amanaty» aýyl turǵyndarynyń tabysyn arttyrý jobasynyń aıasyn keńeıtý boıynsha jumys bastaldy. Jobada syıaqy mólsherlemesi 2,5 paıyzdan aspaıtyn, eń joǵary merzimi 7 jylǵa deıingi senim bildirilgen ókil (agent) arqyly mıkrokredıtter berý kózdelgen. Pılottyq jobanyń aıasyn keńeıtý úshin osy jylǵa 17 myńnan astam mıkrokredıt berý josparymen 100 mlrd teńge bólindi», - dedi ol.
Onyń atap ótýinshe, mıkrokredıt berýmen qatar áleýmettik-kásipkerlik korporasıalar arqyly AÓK salasyndaǵy iri ónerkásiptik ınvestısıalyq jobalardy iske asyrý boıynsha Soltústik Qazaqstan oblysynyń tabysty tájirıbesin tırajdaý boıynsha jumys júrgizilip jatyr.
«Qaryz berý sharttary barynsha jeńildetilgen. Bıyldyń ózinde osy maqsatqa 100 mlrd teńge bólindi. Onyń esebinen shamamen 65 taýarlyq sút fermasynyń qurylysy qarjylandyrylatyn bolady. Baıandalǵandy, sondaı-aq AÓK sýbektileri úshin kredıttik quraldar men óndiris faktorlarynyń qoljetimdiligin arttyrý boıynsha júrgizilip jatqan jumystardy eskere otyryp, Agrobank qurý jónindegi usynysty oryndy emes dep sanaımyz», - dedi Álıhan Smaıylov.