Bul somaǵa «Agrarlyq nesıe korporasıasy» AQ-nyń 400 mlrd teńgesi men onyń enshiles uıymy - «QazAgroQarjy» AQ-nyń 151,7 mlrd teńge kiredi.
«Báıterek» holdıńiniń enshiles uıymy Agrarlyq nesıe korporasıasy agroónerkásip keshendi qarjylandyrý boıynsha 400 mıllıardtyq mejeden ótti, dep habarlaıdy aqshamnews.kz Aýyl sharýashylyǵy mınıstrligine silteme jasap.
Ótken jyldyń sáıkes kezeńimen salystyrǵanda naqty qarjylandyrý kólemi 164 mlrd teńgeden asty.
Atalǵan somanyń 320 mlrd teńgeden astamy «Keń dala» jáne «Keń dala 2» baǵdarlamalary boıynsha kóktemgi egin egý jáne kúzgi jıyn-terim jumystaryn qarjylandyrýǵa, al 80 mlrd teńgesi «Agrobıznes» baǵdarlamasyna bólindi.
Bul ótken jylǵy kórsetkishten eki ese kóp.
Korporasıa qarjylandyrý arnalaryn ulǵaıta otyryp, fermerler úshin barynsha qolaıly jaǵdaılar jasady. Sonyń nátıjesinde nesıeni Korporasıa fılıaldarynan kredıttik seriktestikter, ekinshi deńgeıli bankter, áleýmettik-kásipkerlik korporasıalar (ÁKK) jáne mıkroqarjy uıymdary arqyly alýǵa bolady.
«Ótken jyly Agrarlyq nesıe korporasıasy men QazAgroQarjynyń qarjylandyrý kólemi 554,7 mlrd teńgeni qurap, absolútti tarıhı joǵary kórsetkishke jetti. Bıylǵy kórsetkish odan da joǵary bolady. Biz jyl sońyna deıin jalpy soma 700 mlrd teńgeden asady dep josparlap otyrmyz. Kóńil qýantatyny – elimizdegi árbir úshinshi aýyl sharýashylyǵy taýaryn óndirýshi bizdiń klıentimiz. Ótken jyldyń qorytyndysy boıynsha sońǵy qaryz alýshylar sany 85 myńnan asty. Biz klıenttermen durys jumys isteýge erekshe kóńil bólemiz. Olardyń nesıe alýlaryna jáne aýyl sharýashylyǵyn damytýlaryna qoldaý kórsetý úshin barynsha qolaıly jaǵdaılar jasaýǵa tyrysamyz», - dep atap ótti «Agrarlyq nesıe korporasıasy» AQ Basqarma Tóraǵasy Almat Áshirbekov.
Esterińizge sala keteıik, bıyl kóktemde egin egý jáne kúzgi jıyn terim jumystaryn júrgizý úshin Agrarlyq nesıe korporasıasynyń jańa «Keń dala 2» baǵdarlamasy iske qosyldy.
«Bul qarjy resýrstary jeke kapıtal naryǵynan tartylady, bul rette qaryz alýshylar úshin jyldyq syıaqy mólsherlemesi jeńildetilgen 5% mólsherinde bekitildi. Bıyl kepil múlki jetpeıtin fermerler úshin alǵash ret «Damý» Qory qaryz somasynyń 85%-yn kepildendiretin boldy. Ótinim tek Agrarlyq nesıe korporasıasyna beriledi, odan ári Korporasıa kepildik alý úshin Qorǵa ótinimdi ózi jiberedi», - dep túsindirdi Korporasıanyń Basqarma Tóraǵasy.
2,2 myńnan astam fermerdi qamtyǵan «Agrobıznes» ámbebap baǵdarlamasy belsendi túrde iske asyrylýda. Bıyl mal sharýashylyǵyn, ósimdik sharýashylyǵyn damytý jáne aýyl sharýashylyǵy ónimderin qaıta óńdeý jobalaryna shamamen 80 mlrd teńge bólindi.
Budan bólek 16 ınvestısıalyq joba paıdalanýǵa berildi. Olardyń qatarynda sýarý júıeleri, óńdeý, kókónis jáne jemis saqtaý qoımalary, taýarly sútfermalary, qus fabrıkalary, jylyjaılar men baqtar bar.
QazAgroQarjy jyldyq syıaqy mólsherlemesi 5% bolatyn jeńildetilgen lızıńti iske qosty. Baǵdarlama otandyq óndirýshilerdiń aýyl sharýashylyǵy tehnıkasyn satyp alý úshin 7 jylǵa deıingi merzimge qarjylandyrady. Qazirgi ýaqytta QazAgroQarjy osy baǵdarlama boıynsha 67,4 mlrd teńgege 1,6 myńnan astam aýyl sharýashylyǵy taýaryn óndirýshilerdi qarjylandyrdy, bul 2,6 myńnan astam tehnıka satyp alýǵa múmkindik berdi.