Elimizde jyl basynan beri polısıa qyzmetkerleri aǵashtar men butalardy zańsyz kesý, joıý nemese zaqymdaý boıynsha 100-ge jýyq qylmystyq is qozǵady.
Ákimshilik jaýapkershilikke 119 adam tartyldy, 9,5 mln teńgeden astam somaǵa aıyppul salyndy. Zańsyz kesilgen 600 tekshe metrden astam aǵash tárkilendi, dep habarlaıdy Almaty-akshamy.kz.
Polisia.kz-tiń málimetinshe, aǵashtardy zańsyz kesý faktileri kóbine Almaty, SHQO jáne Abaı oblysynda tirkelgen. Mysaly, Qyzylordada sekseýildi zańsyz kesý faktileri tirkeldi. Polıseıler Qyzyl kitapqa engen aǵashtardy tasymaldaǵan turǵyndy ustady. Bul fakti boıynsha “Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý” babyna sáıkes qylmystyq is qozǵaldy. Shyǵys Qazaqstan oblysynda 19 tekshe metr bolatyn balqaraǵaı aǵashyn zańsyz kesý faktisi anyqtaldy. Keltirilgen zalal somasy 1,3 mln teńgeden asty.
Taǵy bir mysal – jaqynda Jetisýda bolǵan jaǵdaı. Brakonerler myńǵa jýyq kesilgen aǵashty satpaq bolǵan jerinde ustalǵan. Atalǵan faktilerge qatysty “Aǵashtar men butalardy zańsyz kesý, joıý nemese zaqymdaý” baby boıynsha sotqa deıingi tergeý bastaldy. Polıseıler qomaqty zalal keltirý men tabıǵı resýrstardyń joıylýyna baılanysty osy baǵyt boıynsha qosymsha kúshter men quraldardy tarta otyryp, “Brakoner” jedel-profılaktıkalyq is-sharasyn ótkizip jatyr. Operasıa barysynda tártip saqshylary qorshaǵan ortany qorǵaý organdarymen birlesip, erekshe qorǵalatyn aýmaqtardy, qoryqtar men ulttyq parkterdi tekseredi.
«Esterińizge sala keteıik, aǵashtar men butalardy zańsyz kesý, joıý nemese zaqymdaý úshin ákimshilik jáne qylmystyq jaýapkershilik qarastyrylǵan. ÁQBtK-niń 381-1-baby boıynsha sanksıa 50 AEK-ten 150 AEK-ke deıingi aıyppuldy kózdeıdi. Al eleýli zalal keltirilgen kezde QK-niń 340-baby boıynsha qylmystyq is qozǵalady, ol 160 AEK-ten 10 jylǵa deıin bas bostandyǵynan aıyrýdy kózdeıdi», – dedi QR İİM ÁPK erekshe tapsyrmalar jónindegi aǵa ınspektory Tóleýbaı Muhamadıev.
İİM azamattardy tabıǵatty qorǵaý zańnamasyn saqtaýǵa jáne tabıǵatqa uqypty qaraýǵa shaqyrady. Eger siz aǵashtardy zańsyz kesý jáne taǵy da basqa quqyq buzýshylyq faktilerine kýá bolsańyz, dereý 102 arnasyna habarlaýdy suraımyz.