Karateden tuńǵysh Olımpıada júldegeri.
Karateden Qazaqstan komandasynyń aǵa jattyqtyrýshysy Dýlatbek Qusbekov Olympic.kz saıtyna suhbat berip, Darhan Asadilovtiń jartylaı fınaldyq jekpe-jegine qatysty óz pikirimen bólisti, dep habarlaıdy Almaty-akshamy.kz.
«Darhan bul Olımpıadaǵa maqsatty túrde daıyndaldy. Ol - barlyq jas sportshy úlgi tutatyn, barsha karateshilerge jol kórsetetin talantty sportshy. Ol Tokıoǵa altyn úshin bardy, qazaqtyń kók baıraǵyn eń bıikten kóteremin degen oıda boldy. Biraq bul sport, qola júldeni qanaǵat tutamyz.
Árıne, ishimizde «áttegen-aı» qaldy. Ókinish bar. Darhan jartylaı fınaldaǵy qarsylasymen buryn-sońdy kezdespegen. Óıtkeni, ekeýi eki salmaqta óner kórsetip keldi. Asadilov 60 kelige deıingi, Stıven de Kosta 67 kelige deıingi salmaqta baq synaıdy. Ekeýi de óz salmaqtarynda Tokıo oıyndaryna merziminen buryn joldama alǵan.
Al Olımpıada kezinde eki jeńil jáne eki aýyr salmaq birigip ketti. Sol sebepti salmaǵy aýyr jáne boıy uzyndaý qarsylaspen kezdesý Darhanǵa qıyndaý bolǵan sıaqty.
Dese de, munyń ózi úlken kórsetkish. Darhan Asadilov karateden Olımpıadanyń alǵashqy júldesin alǵan qazaq balasy retinde tarıhta qaldy. Bul jas sportshylarymyzdy alǵa jeteleıtini sózsiz», - dedi aǵa bapker Dýlatbek Qusbekov.