Qazirgi kezde shatyrlardy jetkizý jáne ornatý jumystary júzege asyrylyp jatyr.
Túrkıa úkimeti janyndaǵy apattar men tótenshe jaǵdaılar saldaryn joıý basqarmasynyń (AFAD) qyzmetkerleri Kahramanmarashtaǵy epısentrli jer silkinisterinen zardap shekken provınsıalarda 300 809 shatyr ornatýdy aıaqtady, dep habarlaıdy Almaty-akshamy.kz Azattyq Ruhy -na silteme jasap.
AFAD habarlaǵandaı, jer silkinisi saldarynan zardap shekkender úshin apat aımaǵyna shatyrlar jiberý apat soqqysynan keıingi alǵashqy kúnderden bastap áli de jalǵasyp jatyr. 6 aqpannan bastap jer silkinisinen zardap shekken provınsıalardaǵy 270 aýdanda lagerler quryldy.
«Hataı provınsıasynda jer silkinisinen keıin 69 766, Kahramanmarash provınsıasynda - 66 685, Gazıantep provınsıasynda - 49 670, Adyıaman provınsıasynda - 45 852, Malatıada - 25 380, Adanada - 17 515, Shanlyýrfada - 8 838, Osmanıada - 7 170, Dıarbakyr - 6 328, Kılıste 3 605 shatyr tigildi», - dep túsindirdi AFAD.
Eske salaıyq, 6 aqpanda Túrkıanyń ońtústik-shyǵysynda magnıtýdasy 7 baldan asatyn eki jer silkinisi boldy (jergilikti ýaqyt boıynsha 04.17 - de – 7,7 bal jáne 13.24-te-7,6 bal).
Túrkıanyń ońtústik-shyǵysyndaǵy joıqyn jer silkinisi saldarynan qaza tapqandar sany 42,3 myńnan asty.
Prezıdent Rejep Taıyp Erdoǵan Túrkıada tabıǵı apat qurbandary úshin Jalpyulttyq aza tutý týraly jarıalady. Túrkıanyń memlekettik týlary búkil el boıynsha tómendetildi.
Aıta keteıik, Qazaqstan Prezıdenti Qasym-Jomart Toqaev apat oryn alǵan alǵashy kúni-aq Túrkıa Respýblıkasyna qosymsha gýmanıtarlyq kómek jiberý jóninde Úkimetke tapsyrma berdi. Sondaı-aq Memleket basshysy shuǵyl járdem retinde 1 mıllıon dollar bólinetinin habarlaǵan edi. Budan bólek, qazir zilzala bolǵan aımaqta qazaqstandyq qutqarýshylar da adamdardy izdestirý jumystaryna baryp qaıtty. Al qazaqstandyq eriktiler Kahramanmarash qalasynda 100-den astam qazaq úıin tikti.
Budan bólek, álemge tanymal qazaqstandyq ánshi Dımash Qudaıbergen Stranger álemdik týrne-konsertiniń bıletterinen túsken qarjynyń bir bóligin Túrkıadaǵy jer silkinisinen zardap shekkenderge kómek retinde aýdarmaq.