Energetıka mınıstri Almasadam Satqalıevtiń jetekshiligimen Qazaqstan delegasıasy Reseıge issaparmen baryp qaıtty, dep habarlaıdy aqshamnews.kz
Vedomstvonyń aqparatynsha, bul sapardyń negizgi maqsaty — Lenıngradtyq AES-tyń jumys tájirıbesimen tanysý jáne VVER-1200 reaktorlary bar 3+ býyn energobloktarynyń tehnologıalaryn zertteý boldy. VVER-1200 reaktory - «Rosatom» memlekettik korporasıasynyń flagmandyq jobasy.
Qazaqstannyń Reseıge sapary AES salýǵa qajetti tehnologıa jetkizýshilermen júrgizilgen dıalogtyń sońǵy kezeńi boldy. Buǵan deıin delegasıa Ońtústik Koreıa, Fransıa jáne Qytaıǵa baryp qaıtqan edi.
Qazirgi tańda AES salýǵa úmitker retinde tórt kompanıa tirkeldi:
Reseıdiń «Rosatom»
Qytaıdyń CNNC
Ońtústik Koreıanyń KHNP
Fransıanyń EDF kompanıasy.
Mınıstrliktiń málimetinshe, AES salýǵa arnalǵan tehnologıa jetkizýshisin tańdaý boıynsha sońǵy sheshim bıyl qabyldanady. Ol ulttyq múddeler, halyqaralyq normalar jáne MAGATE-niń usynystary negizinde júzege asyrylmaq.