Satbayev University-diń qaýymdastyrylǵan profesory Inesh Kenjına atom elektr stansıasynyń qurylysy Qazaqstannyń ındýstrıalyq-ınnovasıalyq damýyna kúshti serpin beretinin málimdedi, dep habarlaıdy aqshamnews.kz
Onyń aıtýynsha, AES salý qurylys ındýstrıasynda, mashına jasaýda, energetıkada, aqparattyq tehnologıalarda jáne basqa da joǵary tehnologıalyq salalarda jańa jumys oryndaryn qurý arqyly eldiń ekonomıkasyn damytýǵa yqpal etedi. Bul atom energıasy salasynda ǵylymı-tehnıkalyq qyzmetti damytýǵa jáne ıadrolyq tehnologıalardyń ulttyq ortalyqtaryn qurýǵa jol ashyp, ınvestısıa tartýǵa jáne tıisti eksportty damytýǵa múmkindik beredi.
– Barlyq osy faktorlar energetıka men oǵan irgeles salalardaǵy ǵylymı zertteýler men ınovasıalardy damytýǵa yqpal etedi, bul bizdiń elimizdiń tehnologıalyq deńgeıin aıtarlyqtaı jedeldetedi, – dep atap ótti Inesh Kenjına.
Sonymen qatar, profesordyń pikirinshe, AES qurylysy elimizde bilim berý jáne kadr daıarlaý salasyna da oń áser etedi. Atom salasyndaǵy joǵary bilikti mamandarǵa degen suranys ýnıversıtetter men ǵylymı-zertteý ınstıtýttaryn damytýǵa jol ashady. Bul bilim berý mekemeleriniń atom energetıkasy men jańa tehnologıalar boıynsha oqý baǵdarlamalaryn jańartýǵa, halyqaralyq tájirıbeni keńinen qoldanýǵa múmkindik beredi.
– AES tek energetıkalyq sektordy ǵana damytyp qoımaıdy, ol ǵylym men bilimniń de damýyna serpin beredi. Bul Qazaqstannyń joǵary tehnologıalar salasyndaǵy básekege qabilettiligin arttyrady jáne uzaq merzimdi perspektıvada eldiń ǵylymı áleýetin kóteredi, – dedi Inesh Kenjına.
Onyń aıtýynsha, AES qurylysy sondaı-aq halyqaralyq áriptestikke yqpal etip, Qazaqstanǵa sheteldik ınvestorlar men tehnologıalardy tartý múmkindigin beredi. AES jobalary halyqaralyq standarttarǵa saı bolǵandyqtan, álemniń jetekshi elderimen tehnologıalyq almasý jáne tájirıbe bólisý múmkindigi artady.
– Bul joba Qazaqstannyń jahandyq energetıkalyq naryqtaǵy ornyn nyǵaıtyp qana qoımaı, tehnologıalyq táýelsizdigin qamtamasyz etýdiń mańyzdy qadamy bolmaq, – dep qorytyndylady profesor.