Májilis depýtaty Muqash Eskendirov:
Qazirgi tańda elimizdiń ońtústik óńirleri energıa tapshylyǵyn qatty sezinip otyr. Bul másele aldaǵy ýaqytta kúrdelene túsýi múmkin. Osy jaǵdaıdy eskere otyryp, elimizde atom elektr stansıasyn (AES) salý – ońtústik aımaqtardaǵy energıa tapshylyǵyn sheshýdiń eń tıimdi joly.
AES salý arqyly ońtústik óńirlerdiń elektr energıasyna degen qajettiligin tolyqtaı qamtamasyz etýge múmkindik týady. Bul sheshim energetıkalyq táýelsizdikke qol jetkizip, ımportqa degen táýeldilikti azaıtady. Sonymen qatar, sıfrlyq tehnologıalardyń qarqyndy damyp jatqan kezeńinde turaqty ári senimdi energıa kózi aýadaı qajet.
AES-tiń artyqshylyqtary:
- Energıa tapshylyǵyn joıý: AES elimizdegi elektr qýaty tapshylyǵyn qysqartý arqyly halyqty jáne óndiristik salany turaqty energıamen qamtamasyz etedi.
- Ekonomıkalyq turaqtylyq: Energıa tapshylyǵyn joıý kásipkerlik pen ónerkásip salalarynyń turaqty jumys isteýine jol ashady, bul ekonomıkalyq ósimge oń yqpal etedi.
- Ekologıalyq tıimdilik: AES parnıktik gazdardyń shyǵaryndylaryn azaıtyp, ekologıalyq ahýaldy jaqsartady.
AES qurylysy elimizdiń ońtústik óńirlerindegi energetıkalyq jáne ekologıalyq máselelerdi sheshýdiń naqty joly bolmaq. Bul qadam Qazaqstandy energetıkalyq turǵydan táýelsiz elge aınaldyrýǵa yqpal etedi.