Satbayev University-diń jalpy fızıka kafedrasynyń oqytýshysy, Japonıada bilim alǵan Dıdar Shoqov atom elektr stansıasyn salýdy qoldaıdy, dep habarlaıdy aqshamnews.kz
– 2011 jyldan keıin Japonıa atom energetıkasy boıynsha eń qatań qaýipsizdik standarttaryn engizdi. Bul standarttar álemdegi eń qaýipsiz bolyp sanalady. Osyǵan baılanysty Qazaqstan olardyń tájirıbesin tolyqtaı paıdalana alady, – dedi ǵalym.
Qaýipsizdikti qamtamasyz etý úshin maman senimdi jetkizýshiler men seriktesterdi durys tańdaýdyń mańyzdylyǵyn atap ótti. Onyń pikirinshe, AES qurylysyna kem degende on jyl qajet bolady.
– Meniń oıymsha, atom elektr stansıasy elimizdiń energetıkalyq qaýipsizdigin arttyrady. AES – durys paıdalanylǵan jaǵdaıda óte senimdi jáne qaýipsiz nysan, ári bolashaǵy zor energıa kózi. Árıne, basqa da stansıalar sıaqty onyń da óz kemshilikteri bar, biraq artyqshylyqtary basymyraq, – dep atap ótti Dıdar Shoqov.
Ǵalym AES-ti JEO-men salystyra otyryp, alǵashqysynyń ekologıalyq artyqshylyqtaryna toqtaldy.
– JEO qorshaǵan ortany qatty lastaıdy. AES-tiń de óz lastaý kózderi bar, biraq olar negizinen ıadrolyq otyn qaldyqtaryna qatysty. Búgingi ǵylym bul qaldyqtardy oqshaýlap, saqtaýdy jaqsy meńgergen. Al JEO-dan shyǵatyn shań men gazdarmen áli kúresýdiń tıimdi ádisi tabylǵan joq. Iadrolyq qaldyqtardyń ekologıaǵa ǵalamdyq áseri joq, – dep sanaıdy ol.
Dıdar Shoqovtyń pikirinshe, AES qurylysy Qazaqstanǵa kem degende 10-15 mıllıard dollar ınvestısıa tartady. Eger sheteldik kompanıalar qurylysqa qatyssa, bul kóptegen jańa jumys oryndaryn ashady.
– Qurylys pen paıdalaný úshin birneshe myń bilikti maman qajet bolady. Bul Qazaqstan ǵylymyna da oń áser etedi. Uzaq merzimdi perspektıvada bul joba elimizdiń ártúrli salalaryna kóptegen oń áserin tıgizedi, – dep qorytyndylady ǵalym.