AES qurylysyna qatysty alǵashqy syzbada stansıa salýǵa qajetti qarajattyń 80%-i qaryzǵa alynatyny, 20%-ine úkimettiń óz qarajaty jumsalatyny kórsetilgen.
Sonymen qatar syrttan ınvestorlardy tartý máselesi de qarastyrylyp jatyr. AES jalpy 60 jyl jumys isteıdi. Onyń alǵashqy 20 jyly qurylysqa ketken qarjyny aqtaýǵa, al qalǵan 40 jyly ınvestısıany qaıtarýǵa jumsalady.
Alaıda qurylysqa qatysty naqty sheshim qabyldanbaǵandyqtan, naqty boljam jasaý qıyn. Degenmen AES qurylysyna basqa elder de múddeli bolǵandyqtan, sheteldik seriktester jobaǵa ınvestısıa quıýdan tartynbaıdy dep oılaımyn.
Ekonomıkalyq turǵydan alǵanda, AES-ten alynatyn energıanyń quny kómir energıasynan qymbatyraq bolýy múmkin. Eger AES-ta eshqandaı apat bolmasa, ýaqyt óte kele bul qarajat óz-ózin aqtaıdy. Sonymen qatar Qazaqstan AES-tyń negizgi shıkizaty ýrandy satý boıynsha álemde jetekshi el ekenin eskersek, ózimizde óndiriletin shıkizatty qoldaný arqyly AES óndiretin energıanyń qunyn tómendetýge bolady dep boljaýǵa bolady. Bir stansıa sátti salynyp, jumys isteı bastasa, eldiń basqa aımaqtarynda da AES salý múmkindigi paıda bolady. Osylaısha bul uzaq merzimdi ınvestısıalyq tartymdy salaǵa aınalýy múmkin.