Respublica partıasynyń Májilis depýtaty Nurgúl Taý «Alataý jaryq kompanıasy» AQ ujymymen jáne almatylyq jastarmen kezdesý ótkizdi.
Kezdesý barysynda depýtat atom elektr stansıasynyń ne ekenin jáne onyń elge tıgizetin paıdasyn qarapaıym tilmen túsindirdi. Atom elektr stansıasy — atom energıasyn paıdalanyp elektr energıasyn óndiretin ónerkásip. AES atomdardyń bólinýi kezinde jylý bóletin proses negizinde jumys isteıdi. Bul jylý sýdy ysytý úshin paıdalanylady, al ystyq sý býǵa aınalady. Bý týrbınalardy aınaldyrady, al týrbınalar elektr energıasyn óndiredi.
Nurgúl Taý atom energetıkasyn damytý arqyly elimizdiń ımporttyq energetıkalyq resýrstarǵa táýeldiligin azaıtýǵa, ekologıalyq qaýipsizdikti nyǵaıtýǵa jáne parnıktik gazdardyń bólinýin qysqartýǵa qol jetkizýge bolatynyn atap ótti.
Qazaqstanda atom elektr stansıasyn salý máselesi boıynsha respýblıkalyq referendým 2024 jyldyń 6 qazanynda ótedi. Árbir qazaqstandyq osy referendýmǵa qatysý arqyly óz pikirin bildire alady.