Aldaǵy referendým «estıtin memleket» tujyrymdamasynyń júzege asýymen tolyq sáıkes keledi, dep habarlaıdy aqshamnews.kz
Saıası ǵylymdar doktory Jomart Sımtıkovtyń aıtýynsha, Qazaqstanda atom elektr stansıasyn (AES) salý máselesi boıynsha referendým ótkizý «estıtin memleket» tujyrymdamasyn júzege asyrýmen tolyqtaı úndesedi.
– Aldaǵy referendýmdy demokratıalyq prosestiń oń aspektisi retinde qarastyrýǵa bolady. Eń mańyzdysy – fızıka jáne ıadrolyq energıa salasyndaǵy mamandardyń pikiri eskeriletin bolady. Meniń oıymsha, elimizde atom stansıasyn salý energetıkalyq jáne ekologıalyq máselelerdi sheshýge múmkindik beredi. Bul «Jańa Qazaqstan» maqsattaryna jetýge, sonyń ishinde ádiletti qoǵam qurýǵa septigin tıgizedi, – dedi ǵalym.
Jomart Sımtıkov AES qurylysy Qazaqstanda birqatar baǵyttardy damytýǵa múmkindik beretinine toqtaldy.
– Birinshiden, bul elimizdi energetıkalyq táýelsizdikke jetkizedi. Ekinshiden, energetıka salasyndaǵy aımaqtyq básekede kóshbasshylyq oryndy saqtaýǵa múmkindik beredi. Úshinshiden, sıfrlyq tehnologıalardyń damýynda energıa tapshylyǵyn boldyrmaýǵa kómektesedi. Tórtinshiden, osy salada bilikti mamandar daıarlaý júıesin damytýǵa yqpal etedi. Bul tizimdi áli de jalǵastyrýǵa bolady, – dep atap ótti sarapshy.
Sarapshynyń pikirinshe, referendým ótkizý faktisi elimizde ashyq qoǵam qalyptasyp jatqanyn, onda bılik pen halyq arasyndaǵy dıalog jumys isteıtinin, mańyzdy máseleler azamattardyń qatysýy men pikiri eskerile otyryp, demokratıalyq jolmen sheshiletinin dáleldeıdi.
– Meniń oıymsha, AES salý elimizdiń áleýmettik-ekonomıkalyq ahýalyn jaqsartýǵa yqpal etedi, – dep túıindedi Jomart Sımtıkov.