Prezıdent quqyq qorǵaý organdarynyń basshylarymen keńesti.
Prezıdent İshki ister mınıstri Erjan Sádenovpen, Bas prokýror Berik Asylovpen, Joǵarǵy Sot tóraǵasy, sondaı-aq basqa da salalyq vedomstvolardyń basshylarymen kezdesip, konsýltasıalar ótkizdi, dep habarlaıdy Almaty-akshamy.kz Aqordaǵa silteme jasap.
Memleket basshysy zańnyń saqtalýyna, azamattardyń quqyqtyq sanasy men quqyqtyq mádenıetiniń deńgeıin arttyrýǵa qatysty máselelerge basa mán berdi.
Qasym-Jomart Toqaevtyń pikirinshe, Zań men Tártip qaǵıdaty Qazaqstan qoǵamynyń ıdeologıalyq jáne saıası temirqazyǵyna aınalýǵa tıis. Qazirgi qalyptasqan jaǵdaı kóshedegi mádenıetsizdikten bastap tóbeles, urlyq, kisi óltirýge deıingi quqyqbuzýshylyqtyń barlyq túrine ymyrasyz qarsy turýdy talap etedi.
Prezıdent osyndaı keleńsizdiktermen tutas qoǵam bolyp kúresý kerek dep sanaıdy. Elimizde turmystyq zorlyq-zombylyq, vandalızm, dórekilik jáne buzaqylyq sıaqty Zań men Tártip buzýshylyqtyń kez kelgen túrine múlde tózbeıtin ári ony qatań aıyptaıtyn jaǵdaı qalyptastyrý qajet. Áıelder men balalarǵa zorlyq-zombylyq kórsetý faktileriniń batyl túrde jolyn kesý kerek.
Qasym-Jomart Toqaev İshki ister mınıstrligine elorda meıramhanalarynyń birinde bolǵan kisi ólimine qatysty rezonans týdyrǵan oqıǵany erekshe baqylaýǵa alýdy tapsyrdy.
«Zań bárine birdeı. Azamattarymyz zańdylyqty nyǵaıtý jolynda judyryqtaı jumylsa ǵana qoǵamda ádildik ornaıdy. Ádiletti Qazaqstan – Zań men Tártip ústemdik quratyn el», – dedi Prezıdent.
Esterińizge sala keteıik, Memleket basshysy Respýblıka kúni qarsańynda ótken jıynda sóılegen sózinde Ádiletti Qazaqstandy qurý úshin quqyqtyq mádenıetti damytý qajet degen bolatyn.
«Zańsyzdyq, tártipsizdik, mádenıetsizdik eldi jarǵa jyǵady. Mundaı jaǵymsyz úrdiske búkil qoǵam bolyp qarsy turýymyz kerek. Al tártipke baǵynǵan qoǵam órkenıetti bolady. Bul – zańdylyq. Ár azamat elimizdiń zańyn qurmettese, bereke-birlik te, baqýatty turmys ta bolady», – dedi Qasym-Jomart Toqaev.
Prezıdent kezdesýler men konsýltasıalar barysynda qoǵamda ádildik pen tártip ornatý úshin quqyq qorǵaý organdary men sot ınstansıalary qyzmetkerlerine aıryqsha jaýapkershilik júkteletinin atap ótti.