Qazaqstanda óziniń naqty tabysyn jasyryp, alıment tólemeı júrgen azamattarǵa qatysty másele sheshimin tapty. Ádilet mınıstrligi «Smart Data Ukimet» platformasynda jalaqy mólsherin tómendetken derekterdi anyqtaıtyn analıtıkalyq keısti iske asyrdy. Bul týraly OKQ alańynda QR ádilet vıse-mınıstri Bekbolat Moldabekov málimdedi.
Ádilet mınıstrligi úlken derekterdi zertteý arqyly eń tómengi jalaqy mólsherin kórsetip, alıment tólemeı júrgen azamattardy anyqtaýǵa múmkindik aldy. Bul máseleni tolyǵymen joıý úshin mınıstrlik MKK-men birlesip jumys júrgizýdi josparlap otyr.
Kelesi joba - «JSO-robot». Buryn, eger azamat Sergek kamerasyna túsip, taǵaıyndalǵan aıyppuldy 50 kún ishinde tólemegen bolsa, onda bul is jeke sot oryndaýshylaryna beriletin. Qyzmetker shotty shektep, aıyppuldyń 25%-n 10 AEK-ke deıingi somasyn óndirip alatyn. Endi azamattar jyl saıyn osy robottyń arqasynda 2,2 mlrd teńge únemdeıdi. Eger azamat tólemdi 50 kúnnen keshiktirse, qosymsha SMS, Push-habarlamalardy bankterdiń qosymshalary arqyly jiberý josparlanǵan, bul qarjy óndirmeý úshin jasalady.
Taǵy bir jańalyq – azamattarǵa quqyqtyq qoldaý «E-zań kómegi» júıesi arqyly kórsetiletin bolady. 1 shildeden bastap bul júıe beınekonferensıa rejıminde jumys isteıdi.
«Zań keńesshisi nemese advokat siz úshin árdaıym qoljetimdi bolady. Kez kelgen jaǵdaıda oǵan qońyraý shalyp, keńes ala alasyz», - dep túsindirdi vıse-mınıstr.
«E-zań kómegi» mobıldi qosymshasynda jasandy ıntellektpen chat-bot engizý josparlanýda. Bul azamattarǵa 24/7 rejıminde quqyqtyq suraqtarǵa jaýap alýǵa múmkindik beredi.