Ol saılaýǵa qatysýdan bas tartty.
Ádilbek Jaqsybekov Qazaqstan fýtbol federasıasynyń prezıdenti laýazymyn saılaýdaǵy jańa merzimge qatysýdan bas tartyp, úndeý jasady, dep habarlaıdy Almaty-akshamy.kz.
«QFF músheleriniń basym bóligi meni qoldaıtynyn bildirip, kandıdat retinde usynǵanyna qaramastan, men jańa merzimge saılanbaýdan bas tarttym. Meniń oıymsha, federasıa tóraǵalyǵynan bas tartýdyń ýaqyty keldi. QFF prezıdenttigine laıyqty úmitkerler kóp jáne aldaǵy saılaýǵa qoǵamnyń qyzyǵýshylyǵyn baıqaýǵa bolady. Bul federasıanyń joǵary bedelin, fýtbolǵa degen úlken qyzyǵýshylyqty, onyń damýy úshin jumys isteýge degen zor qulshynysynyń kórsetkishi jáne bul da federasıanyń sońǵy jyldardary júrgizgen jumysynyń jemisi. Úmitkerlerdiń barlyǵyn jaqsy bilemin, biz kóp jyldar boıy birge jumys istedik. Men federasıa músheleri laıyqty prezıdentti saılaıtynyna senimdimin jáne barlyq úmitkerlerge aldaǵy saılaýda sáttilik tileımin», - dedi óz málimdemesinde Ádilbek Jaqsybekov.
Bir kún buryn atalǵan federasıanyń saılaý komıtetiniń jıyny ótken. Shara barysynda komıtet QFF prezıdenti saılaýyna qaýymdastyq músheleri usynǵan úmitkerlerdiń qujattaryn qaraǵan.
«Saılaý 2022 jyldyń 28 aqpanynda QFF konferensıasynda ótedi», - delingen habarlamada.