TÚRKSOI uıymynyń 30 jyldyq mereıtoıy ótti.
Mereıtoılyq sharalardyń qorytyndy saltanatynda túrki dúnıesiniń ádebıeti men ónerine qosqan zor úlesi úshin Bıbigúl Tólegenova, Oljas Súleımenov jáne Murat Áýez TÚRKSOI uıymynyń eń bıik marapaty - ONUR NISANI - QURMET BELGİSİ - altyn medalimen marapattaldy, dep habarlaıdy Almaty-akshamy.kz
«Birikken de, bólingen de zaman ótti. Toq bolǵan da, joq bolýǵa taıaǵan da dáýirler ótti. Ótti, biraq áli kete qoıǵan joq. Qaýip qashanda qabyrǵa syrtynda» - dedi Murat Áýez TÚRKSOI uıymynyń 30 jyldyq mereıtoıy aıasynda ótip jatqan kitap kórmesiniń ashylý saltanatynda.
Kúni keshe ǵana soltústik kórshimizdiń ózimen baýyrlas halyqtyń jurtyn jer betinen joq qylyp jiberý jolyndaǵy aqylǵa syımaıtyn arpalysynyń kýási bolyp otyrmyz. Qanshama halyq qyryldy, qańǵyp, bosyp ketti, áli de qanshama bozdaqtyń sory, adamzattyń azaby turǵany belgisiz.
Qansha jerden beti aýlaq degenimizben, qaýip, mine, kóz aldymyzda, shynymen de qabyrǵamyzdyń syrtynda ǵana tur.
Qaı zamanda da halyqtyń eńsesin kóterip, janyn jadyratyp, kóńiline qýanysh, júregine rýh bergen - óner, bilim, mádenıet jáne sony jasaýshy zıaly qaýym. Teńizdiń tamshysyndaı ǵana bolyp kórinetin jazylǵan eńbek, salynǵan sýret, jasalǵan týyndy birige-birlese kele kózi qaraqty oqyrman men kórermendi ıakı qarapaıym halyqty óziniń aınalasyna jınary haq.
Mine, sonyń nátıjesi retinde sońǵy kúnderi Almaty qalasynda túrik halyqtarynyń zalqar zıalylary bas qosyp, bereke-birlik saltanatyn birge atqardy.