Búgingi kúni kórshi Qytaı elimen de baılanys túzelip, barys-kelis artty. Bul zaman talaby. Eki ortadaǵy alys-beriste artty. Aralastyq artqan jerde mádenı almasýlardyń oryn alatyny aıtpasa túsinikti. Sondyqtan eki el arasynda mádenı is-sharalar bolyp, mádenı almasý bolyp jatqanyn kóz kórip jatyr. Kúni keshe QR Ulttyq kitaphanasynda qazaq-qytaı ádebı baılanystary jaıly «Ádebı dostyq shýaǵy» atty halyqaralyq is-shara ótti, dep habarlaıdy aqshamnews.kz.
Sharanyń ótýine «Shyńjań gazeti» men «Kórshiles» jýrnalynyń redaksıasy, «Beıjiń Shans halyqaralyq mádenı almasý» JSHS, «Shyǵys ádebıeti baspasy, QR Ulttyq kitaphanasy muryndyq bolypty. Aıta ketý kerek sharany aqyn, aýdarmashy Saıat Qamshyger júrgizip otyrdy. Eki el arasyndaǵy mádenı baılanystyń artýy el ádebıeti men tarıhı muralardy zertteýge úlken jol ekenin sóz arasynda Saıat Qamshyger aıtty.
Munan keıin, alǵashqy sózdi alǵan Almatydaǵy Qytaı bas konsýldyǵynyń vıse-konsýly Lúı I myrza is-sharanyń mańyzyna toqtaldy. Eki el arasyndaǵy ádebı-mádenı baılanystardy qoldaıtynyn, qajet bolǵan jerde demeýshilik kórsetýge de daıyn ekenin jetkizdi. Al sharaǵ arnaıy kelgen aqyn, jýrnalıs, etnograf, Qazaqstannyń eńbek sińirgen qaıratkeri, Qazaqstan Jazýshylar odaǵy basqarma tóraǵasynyń orynbasary Qasymhan Begmanov qazaq-qytaı mádenı baılanystary, atqarylyp jatqan ádebı jobalar, tanymal qalamgerlerdiń shyǵarmalary jaıly keleli sóz qozǵady. Óz kezeginde sóz alǵan aqyn, Halyqaralyq «Alash» ádebı syılyǵynyń laýreaty, QR Memlekettik kitap palatasy dırektorynyń orynbasary Maraltaı Raıymbekuly da eki eldiń arasyndaǵy baılanys tarıhı eńbekterdiń zerttelýine ashylǵan jol ekenine toqtaldy. Aqyn tebirene otyryp oqyǵan óleńderi de sharanyń mán-mańyzyn arttyra tústi.
Al sharaǵa kelgen A.Baıtursynuly atyndaǵy Til bilimi ınstıtýtynan kelgen ǵalym, qytaıtanýshy Qaırat Ǵabıthanuly, Ál-Farabı atyndaǵy QazUÝ shyǵystaný fakúlteti, qytaıtaný kafedrasynyń meńgerýshisi Erjan Kerimbaev, Qazaqstan Jýrnalıser odaǵynyń múshesi Joldybaı Muzafarov eki halyqtyń ádebı-mádenı baılanystary jaıynda tebirene sóz sóıledi. Al sharaǵa arnaıy kelgen jetigenshi Tursynaı Álibekqyzy qazaqtyń ulttyq áýenderin tamyljyta oryndasa, dástúrli ánshi Madıar Ómirǵaly «Dýdaraı» ánin shyrqap, kórshi el ókilderin tańqaldyrdy. Al ál-Farabı atyndaǵy QazUÝ stýdentteri Tań dáýiri poezıasyn, Lıbaıdyń jyrlaryn mánerlep oqydy. İs-sharany «Shyǵys ádebıeti» baspasynyń basshysy Jeńis Omar qorytyndylady.