Rahmet
Qurbym ekeýmiz saýda ortalyǵynda uıymdastyrylǵan vıktorınalyq oıynǵa qatysyp, jumsaq oıynshyq utyp aldyq. Qaıtar jolda ákesimen kele jatqan aqyl-esi kem balany kórdik te, oıynshyǵymyzdy soǵan ustattyq. Bala bizge «rahmet» dedi. Ákesiniń kózi jasaýrap, jylap jibere jazdady. Sóıtsek, bala birneshe aıdan beri múldem sóılemegen eken.
Dostyq
Tórt aı buryn dárigerler maǵan shashymnyń túsetinin aıtqan. Shynymen de shashym túsip, taqyrlanyp qaldy. Mektepke barýǵa, synyptastarymnyń kózine túsýden qoryqtym. Maǵan bári saýsaǵyn shoshaıtyp, kúletin sıaqty bolyp kórindi. Erteńine esik qaǵyldy. Ashsam, esik kózinde onshaqty dosym turdy, bári shashyn taqyrlap alyp tastaǵan. Olardyń ekeýi qyz bala edi...
Júrek
Úıge tańǵa jýyq oraldym. Kireberisten «Qurmetti kórshiler! Búgin shamamen saǵat 9.20-da esik aldynda 120 somymdy joǵaltyp aldym. Taýyp alsańyzdar, ótinish, ákep berseńizder, 76-páter, Antonına Petrovnaǵa. Zeınetaqym 1640 som» degen habarlandyrýdy kózim shaldy.
Qaltamdaǵy bar aqshamdy jınap, qolyma 120 somdy qysa ustap, joǵaryǵa kóterildim. 76-páterden aldyna fartýk baılaǵan ájeı shyqty. Meni jáne qolymdaǵy aqshany kóre salyp, bas salyp qushaqtaı aldy. Kózinde qýanyshtyń jasy bar. «Un alýǵa shyqqan edim. Podezge taıap, kiltimdi alyp jatqanda túsirip alǵan bolýym kerek aqshamdy», – dep saldyrlap áńgimesin aıtyp jatyr. Biraq! Aqshamdy alýdan bas tartty. Sebebi, men osy jarty saǵattyń ishinde ájeıdiń aqshasyn «taýyp alǵan» 6-shy adam ekenmin. Adamdar, men sizderdi jaqsy kóremin!
Dańq
Instıtýttan kele jatyp, «Avtozavodskaıa» metrobeketiniń janynda otyrǵan soǵys ardagerin kórdim. Aldyna orden-medaldaryn jaıyp qoıypty... Surapyl soǵysta qan keship júrip alǵan marapattary. Tamaq alý úshin satyp otyrǵanyn uqtym. Qaltamdaǵy aqshamdy túgel shyǵaryp usyndym da: «Ata, meniń aqshamdy alyńyzshy, biraq aryńyz ben dańqyńyzdy oǵan turmaıtyn adamdarǵa tıyn úshin satpańyzshy, ótinemin...» dedim tamaǵyma óksik keptelip. Ataı jylap qaldy, aqshany aldy da, orden-medaldaryn alaqanyna salyp jatyp súıip qoıdy syrtynan. «Rahmet, qyzym!» - dedi kóz jasyn jasyryp. Menińshe, álemdi osyndaı bolmashy qadamdarmen de ózgertýge bolady.
İzgilik
Meniń inim 13-te. Ol qaterli isik aýrýyna shaldyqqan. İnimdi klınıkada jalǵyz qaldyrmas úshin, ákem bir jylǵa aqysyz demalysqa shyqty. Biraq jumys orny bir jyl boıyna oǵan jalaqysyn tólep turdy. Jańa Zelandıa polısıasynda ǵajap adamdar eńbek etedi!
Orysshadan aýdarǵan Nur JAMAL.