13 mamyrda Astana qalasynyń qylmystyq ister jónindegi mamandandyrylǵan aýdanaralyq sotynda "Atameken" ulttyq kásipkerler palatasynyń burynǵy basshysy Abylaı Myrzahmetovqa qatysty qylmystyq is qaraldy. Ol asa iri mólsherde alaıaqtyq jasady degen kúdikpen ustalǵan, dep habarlaıdy almaty-akshamy.kz.
Sotta Myrzahmetovtyń 2022 jyly mamyr aıynan qazanǵa deıingi aralyqta B.-ǵa aǵasyn qamaýdan bosatý jáne oǵan qatysty sotqa deıingi is júrgizýdi toqtatý máselesin sheshýge múmkindiginiń bar ekendigin aıtqany anyqtaldy. Ol aqshalaı syıaqy úshin memlekettik jáne quqyq qorǵaý organdarynyń joǵary laýazymdy tulǵalary arqyly bul másele sheshiletinin jetkizgen. Aqyrynda aldaý jáne senimdi teris paıdalaný arqyly alaıaqtyq jolmen formaldy túrde qaryz sharttaryn resimdeı otyryp, B.-nyń asa iri mólsherde 13,9 mlrd teńgesin jymqyrǵan.
Sottalýshy kinásin moıyndap, ádil jaza taǵaıyndaýdy surady.
"Sot úkimimen Myrzahmetov asa iri mólsherde alaıaqtyq jasaǵany úshin kináli dep tanylyp, jergilikti ózin-ózi basqarý organdarynda jáne kvazımemlekettik sektor sýbektilerinde 10 jyl merzimge qyzmet atqarý quqyǵynan aıyryla otyryp, memleket kirisine qylmystyq jolmen alynǵan 5,8 mlrd teńge somasynda aqsha qarajaty tárkilenip, 5 jylǵa bas bostandyǵynan aıyryldy", - dep jazdy Astana qalasynyń qylmystyq ister jónindegi mamandandyrylǵan aýdanaralyq soty.
Sot QR QK-niń 49-babynyń 2-bóligi negizinde QR Prezıdentine Myrzahmetovty "Qurmet" jáne 3-dárejeli "Barys" ordeni syndy memlekettik nagradalarynan aıyrý týraly usynys engizdi.
Myrzahmetovtyń múlkine salynǵan tyıym óz kúshinde qaldyryldy.
Sot úkimi zańdy kúshine engen joq.