Búgin Ábilhan Qasteev atyndaǵy Memlekettik óner mýzeıinde beıneleý óneriniń kórnekti ókili Oral Tańsyqbaevtyń 120 jyldyq mereıtoıyna arnalǵan kórmeniń saltanatty ashylýy ótti, dep habarlaıdy aqshamnews.kz
Kórme Ózbekstan Respýblıkasynyń mádenıet jáne ónerdi damytý qorynyń uıymdastyrýymen jáne Qazaqstan Respýblıkasynyń Mádenıet jáne aqparat mınıstrliginiń qoldaýymen uıymdastyryldy.
Ekspozısıada sýretshiniń erekshe stılin, shyǵarmashylyq murasyn jáne ulttyq keskindemeniń damýyna qosqan úlesin kórsetetin 74 týyndy usynyldy.
İs-sharanyń ashylý rásimine Qazaqstan Respýblıkasynyń Mádenıet jáne aqparat mınıstri Aıda Balaeva, Ózbekstan Respýblıkasy Prezıdentiniń kómekshisi Saıda Mırzıóeva, Almaty qalasynyń ákimi Erbolat Dosaev, sondaı-aq Qazaqstan men Ózbekstannyń jazýshylary, mádenıet jáne óner qaıratkerleri qatysty.
Óz sózinde Aıda Balaeva Oral Tansyqbaevtyń óneri eki eldiń halqyn jaqyndastyryp, sanǵasyrlyq dostyq pen ózara túsinistikti nyǵaıtýǵa úles qosqanyn atap ótti.
«Ol týǵan jeri Ózbekstannyń kórkem tabıǵaty men taý-tasyn shynaıy ári asqan sheberlikpen beınelep, ónersúıer qaýymnyń joǵary baǵasyn aldy. Aıta keterligi, Oral Tańsyqbaev Ábilhan Qasteevpen bir jylda dúnıege kelgen. Eki azamat ta óz elderinde ulttyq kórkemsýret mektebiniń qalyptasýyna yqpal etip, keıingi tolqyn jastarǵa áser etti. Olardyń shyǵarmashylyǵy – týǵan jerine, halqyna, tabıǵatyna degen shynaıy súıispenshiliktiń kórinisi», – dedi Aıda Balaeva.
Sondaı-aq mınıstr Qazaqstan men Ózbekstannyń mádenı saladaǵy belsendi yntymaqtastyǵyn atap ótti. Sońǵy jyldary mádenıet kúnderi, kıno kúnderi, teatr gastrólderi men kórkemóner kórmeleri jemisti uıymdastyrylyp keledi.
Saıda Mırzıeeva óz kezeginde kórmeniń uıymdastyrylýyna rızashylyǵyn bildirip, Qazaqstan men Ózbekstan arasyndaǵy mádenı dıalog pen yntymaqtastyqtyń mańyzyn atap ótti.
Oral Tańsyqbaevtyń 120 jyldyq mereıtoıyna arnalǵan kórme osy jyldyń maýsym aıyna deıin jalǵasady.
Aıta keteıik, Ózbekstan Ulttyq baletiniń gastrólderi men Oral Tańsyqbaev kórmesi Astanada da ótetin bolady.