Almaty qalasynyń Áýezov aýdanynda qoǵamdyq keńistikterdi, aýlalardy abattandyrý jáne turǵyn úı ınfraqurylymyn jańǵyrtý jumystary qarqyndy júrgizilýde. Bul jobalar halyqtyń ómir sapasyn arttyrýǵa baǵyttalǵan «Halyq qatysatyn búdjet» baǵdarlamasy aıasynda júzege asyrylyp jatyr.
Almaty óńirlik komýnıkasıalar qyzmetiniń baspasóz konferensıasynda Áýezov aýdanynyń ákimi Abzal Egemberdıev qazirgi ýaqytta aýdanda tórt iri qoǵamdyq keńistikti abattandyrý jumystary qatar júrgizilip jatqanyn habarlady. Atap aıtqanda, bul — Aqsaı-4 jáne 12-shaǵyn aýdandardaǵy skverler men Mamyr-4 jáne Jetisý-3 shaǵyn aýdandaryndaǵy jaıaý júrginshiler aımaqtary. Jobalar aıasynda balalar men sporttyq alańdar, kóshe jıhazdary men besedkalar ornatý, jaryqtandyrý júıesin jańartý jáne kógaldandyrý kózdelgen.
Negizgi jobalardyń biri — Saıran kólin abattandyrý. Qurylys jumystary ótken jyldyń sońynda aıaqtalyp, búginde bul aýmaq qala turǵyndarynyń súıikti demalys oryndarynyń birine aınalýda. Jobany Qoǵamdyq keńistikterdi damytý basqarmasy júzege asyrýda.
«Qurylys jáne abattandyrý jumystary tolyq aıaqtalǵanǵa deıin sý aıdynynda shomylýǵa tyıym salynady. Qaýipsizdik sharalaryn saqtap, júrgizilip jatqan jumystarǵa túsinistikpen qaraýlaryńyzdy suraımyz. Qoǵamdyq keńistikterge uqypty qaraý — súıikti qalamyzdyń tazalyǵy men kórkine árbir turǵynnyń qosqan úlesi», — dedi aýdan ákimi Abzal Egemberdıev.
Aǵymdaǵy jyldyń qarasha aıyna deıin Jubanov kóshesin jáne Saıran shaǵynaýdanyndaǵy birqatar aýlalardy abattandyrý jáne kógaldandyrý jumystary tolyq aıaqtalady dep josparlanýda. Joba aıasynda demalys jáne sport aımaqtary, balalar alańdary, beınebaqylaý kameralary, shamdar, qoqys jáshikteri ornatylady, sondaı-aq jaıaý júrginshiler men avtoturaq oryndary abattandyrylady.
«Halyq qatysatyn búdjet» baǵdarlamasy da belsendi júzege asyrylýda. 2025 jyly 30 jobany júzege asyrý josparlanyp otyr, onyń ishinde 24 joba — qoǵamdyq keńistikterdi, 6 joba — aýla aýmaqtaryn abattandyrýǵa baǵyttalǵan.
Aýlalardy jaqsartýǵa da erekshe kóńil bólinýde. 2025 jyldyń mamyr aıynda 23 aýlany kúrdeli jóndeý (1,8 mlrd teńge) jáne 97 aýlany aǵymdaǵy jóndeý jumystary bastalyp ketti. Jobalardyń tolyq aıaqtalýy 2025 jyldyń qyrkúıegine josparlanǵan.
2025 jyly taǵy 25 turǵyn úıge sándik jaryq ornatý jáne 45 ǵımarattyń qasbetin jóndeý josparlanyp otyr.
Sonymen qatar, turǵyn úı qoryn jańǵyrtý boıynsha aýqymdy jumystar júrgizilýde. 2025 jyly 678 mln teńgege 45 kópqabatty turǵyn úıdi kúrdeli jóndeý jáne 32 úıde 34 lıftini aýystyrý (420 mln teńge) kózdelgen.