Almaty qalasynyń Áýezov aýdanynda sýmen jabdyqtaý, káriz júıesi, jylý, elektr jelileri men syrtqy jaryqtandyrýdy qamtıtyn ınjenerlik ınfraqurylymdy jańartý jáne damytý baǵytynda aýqymdy jumystar júrgizilip jatyr.
Bul týraly Almaty óńirlik komýnıkasıalar qyzmetiniń baspasóz konferensıasynda aýdan ákimi Abzal Egemberdıev habarlady.
Atap aıtqanda, 2025 jyldyń qarasha aıynda Mamyr-4 shaǵyn aýdanynda 12,3 shaqyrym ınjenerlik jeliniń (6,5 km sýmen jabdyqtaý jáne 5,8 km káriz júıesi) qurylysy aıaqtalady dep kútilýde. Jobany iske asyrý nátıjesinde aýdannyń 1 myńnan astam turǵyny zamanaýı komýnaldyq qyzmetke turaqty qol jetkizetin bolady.
Qurylys jumystary Dostyq shaǵyn aýdanynda da jalǵasýda. Munda 15,7 km káriz jelisi salynyp jatyr. Jobanyń jalpy quny — 2,6 mlrd teńge, aıaqtalýy bıylǵy qazan aıyna josparlanǵan.
2025 jylǵy eń iri jobalardyń biri — Saın – Jandosov – Qarǵaly ózeni – Shalápın kósheleri arasyndaǵy aýmaqta 49 km ınjenerlik jeli (27 km sý jáne 22 km káriz júıesi) salý. Joba 3 myńnan astam turǵyndy sapaly komýnaldyq qyzmetpen qamtamasyz etedi.
Jylý jelilerin jańǵyrtýǵa da erekshe kóńil bólinýde. Ótken jyly «AlTS» JSHS Saın, Toqtabaev, Cherepanov kósheleri men Mamyr-3 jáne 5-shaǵyn aýdandarynda uzyndyǵy 4,9 km jylý jelisin qaıta jańartty. Bul ýchaskelerde komýnıkasıalar sońǵy 30 jyldan astam ýaqyt boıy jańartylmaǵan. Atalǵan jumystarǵa 4,4 mlrd teńge ınvestısıa salyndy. Aǵymdaǵy jyldyń tamyz aıynda Jetysý-2 shaǵyn aýdanynda 1,1 km jylý jelisin jańartý jobasy aıaqtalady dep josparlanǵan.
Aýdandaǵy ózekti máselelerdiń biri — elektr jelileriniń tozýy. Qazirgi tańda olardyń tozý deńgeıi 63%-dy quraıdy, bul jıi apattyq óshirýlerge sebep bolýda: 2023 jyly — 245, 2024 jyly — 232, al 2025 jyldyń ózinde 187 jaǵdaı tirkelgen. Apattyq jaǵdaılardy azaıtý maqsatynda bıyl «AJK» AQ 36,3 km elektr jelisin jáne 49 transformatorlyq qosalqy stansıany qaıta jańǵyrtady. Jobanyń jalpy quny — 120,4 mln teńge.
Sondaı-aq syrtqy jaryqtandyrý júıesin jaqsartý baǵdarlamasy belsendi túrde júzege asyrylýda. Bıyl qosymsha 52 km kabel qalpyna keltirilip, 487 baǵan ornatylyp, 2 500-den astam sham jańasyna aýystyrylady.
Budan bólek, kóshe jaryǵyn ornatý jobasy aıasynda 2025 jyldyń tamyzyna deıin jaryqtandyrylmaǵan 81 ýchaskede 824 baǵan ornatý josparlanǵan.