Almaty qalasynyń Áýezov aýdanynyń ákimi Abzal Egemberdıev aýdanda júzege asyrylyp jatqan áleýmettik saladaǵy aýqymdy jobalar týraly habarlady.
«Sapaly áleýmettik ınfraqurylymdy damytý — erekshe baqylaýda. Halyq sanynyń ósýin eskere otyryp, mektep oryndarynyń tapshylyǵy men balabaqshalardyń qoljetimdiligin júıeli túrde sheship kelemiz», — dedi Abzal Egemberdıev Almaty óńirlik komýnıkasıalar qyzmetiniń baspasóz konferensıasynda.
Búginde aýdanda 5 myń mektep ornyna tapshylyq baıqalady. Bul máseleni sheshý maqsatynda byltyr qyrkúıekte apatty jaǵdaıda bolǵan №97 mektep ǵımaratynyń ornyna 600 oryndyq jańa mektep salyndy. Jobanyń quny — 5,8 mlrd teńge. Sondaı-aq, qarasha aıynda №9 mektepke 1 200 orynǵa arnalǵan seısmıkalyq kúsheıtilgen kúrdeli jóndeý júrgizildi (1,9 mlrd tg). Qazirgi ýaqytta №13, №72 jáne №158 mektepteriniń jańa ǵımarattaryn salý, sondaı-aq №42 mektepke 300 oryndyq jáne №1 mektepke 400 oryndyq qosymsha ǵımarattar salý boıynsha jobalyq-smetalyq qujattama ázirlenip jatyr.
«Balabaqsha oryndarynyń tapshylyǵyn azaıtý — eń basym baǵyttardyń biri. Qazirgi tańda bizge 6 myńnan astam oryn jetispeıdi», — dedi aýdan ákimi.
2025 jyldyń tamyzyna deıin 10-shaǵyn aýdanda 160 oryndyq (1,6 mlrd tg) jáne «Altyn besik» shaǵyn aýdanynda 120 oryndyq (1 mlrd tg) eki jańa balabaqsha paıdalanýǵa beriledi. Sonymen qatar, osy jyly memlekettik saraptamanyń qorytyndysynan keıin Taýgúl shaǵyn aýdanyndaǵy apatty ǵımarattyń ornyna 120 oryndyq balabaqsha qurylysynyń bastalýy josparlanyp otyr.
2025 jyldyń naýryzynan bastap N.Sas atyndaǵy Memlekettik akademıalyq orys balalar men jasóspirimder teatrynyń rekonstrýksıasy júrgizilýde. Jobanyń jalpy quny — 23,9 mlrd teńge. Jobany «BI Urban Construction» JSHS júzege asyrýda. Qurylys jumystary kelesi jyldyń maýsym aıynda aıaqtalady dep josparlanǵan.
Medısınalyq salaǵa kelsek, aýdan ákimi habarlaǵandaı, aqpan aıynda Jetysý-3 shaǵyn aýdanynda erekshe qajettilikteri bar balalardy ońaltýǵa kómektesetin «Parasat» áleýmettik qyzmet kórsetý ortalyǵy ashyldy (aýdany 1760 m²), sondaı-aq, sáýirde Taýgúl-3 shaǵyn aýdanyndaǵy №18 emhana kúrdeli jóndeýden ótti. Jyl sońyna deıin №16 emhananyń kúrdeli jóndeýin aıaqtaý josparlanyp jatyr.
Sonymen qatar, «Qýanysh» shaǵyn aýdanynda aýysymyna 300 adam qabyldaı alatyn jańa emhananyń jobasy ázirlenip jatyr.