Elimizde 2020 jyly Úkimet qaýlysymen 10 tamyz - Abaı kúni dep belgilendi.
Osy ataýly kúnniń qurmetine Almatydaǵy Óńirlik komýnıkasıalar qyzmeti alańynda Abaı Qunanbaevtyń 177 jyldyǵyna arnalǵan onlaın baspasóz máslıhaty ótti, dep habarlaıdy Almaty-akshamy.kz.
Onda ál-Farabı atyndaǵy QazUÝ janyndaǵy Abaı ǵylymı-zertteý ınstıtýtynyń jetekshi qyzmetkeri, fılologıa ǵylymdarynyń kandıdaty, dosent Láılá Musaly sóz sóıledi.
2009 jyly qurylǵan Abaı ınstıtýty óz jumysyn úzdiksiz jalǵastyryp keledi. Negizgi baǵyty – uly aqynnyń ómiri men shyǵarmashylyq murasyn qoǵamdyq gýmanıtarlyq ǵylym salalarynyń toǵysynda zertteý. Instıtýttyń Abai.kaznu.kz. veb-saıtynda ǵylymı-ádistemelik oqýlyqtarynyń mol qory bar.
ǴZI elimizde alǵash ret «Abaıtaný. Tańdamaly eńbekter» atty 50 tomdyq jınaqty qurastyryp shyqty. Tańdamaly eńbekterdiń 50 tomdyq basylymy negizinde iriktelip «Abaıtaný antologıasynyń» 10 tomdyǵy daıyndaldy.
Láılá Musalynyń aıtýynsha, "Abaıtaný antologıasy" – qoǵamdyq-gýmanıtarlyq ǵylymdar júıesindegi, Abaıtaný tarıhyndaǵy úlken jetistiktiń biri. «Abaıtaný antologıasyna» M.Áýezov, Q.Muqamedjanov, M.Myrzahmetov, R.Syzdyqova, Z.Ahmetov, J.Ysmaǵulov, t.b. kórnekti abaıtanýshylardyń irgeli ǵylymı monografıalary, Abaıtaný salasyndaǵy irgeli máselelerdi ǵylymı turǵyda paıymdaıtyn jekelegen zertteýler, J.Dádebaevtyń «Abaıdyń antropologızmi» monografıasy, keıbir pánaralyq sıpattaǵy eńbekter engen.
Spıker sondaı-aq Abaıtaný antologıasy atty ıntellektýaldyq bazasy ashylǵanyn jetkizdi. Bul baza Qazaqstannyń bilim jáne ǵylym júıesi úshin, jalpy dúnıejúzi qazaqtaryna jol ashatyn ıgilikti úlken bazaǵa aınalýy tıis.
«Memleket basshysy aldaǵy ýaqytta gýmanıtarlyq pánderdiń bólinbes bólshegi retinde Abaıtaný kýrsyn oqytý kerek dep naqty mindet qoıdy. Osy baǵytta QazUÝ janynda Abaı ǵylymı-zertteý ınstıtýty oıshyl aqynnyń murasy men Abaıtaný boıynsha eńbekterdi ǵylymı aınalymǵa engizý maqsatynda naqty jumystar atqaryp keledi. Abaı ilimin bilý jobasy aıasynda Abaı toksanomıasy máselesi kóterilýde. Abaı taksonomıasy atty jańa ǵylymı baǵytty negizdep jatyrmyz. Osy jumystardyń aıasynda tek KazUÝ-de ǵana emes, barlyq JOO-da jalpy bilim beretin pánder qataryna qosýdy usynamyz», - dedi Láılá Musaly.
Abaıdyń qara sózderi búgingi kúni de mańyzyn joıǵan joq. Orys tilinde «Qara sózderdiń» úsh birdeı nusqasy bar. Abaıdyń qara sózderi áli de jiktelip, zerttelip, tereńirek mán-maǵynasyn uǵynǵan saıyn, búgingi zamannyń adamyn rýhanı jaǵynan baıyta túsedi.
Láılá Musaly «Prezıdenttiń «Abaı – rýhanı reformator» maqalasynda aıtylǵan paıymdaýlarǵa ustazdar qaýymy oqytý prosesi barysynda únemi nazar aýdaratynyn jetkizdi.
«Rýhanı reformator degen qoǵamnyń sanasyn alǵa jyljytýshy degen maǵynany bildirtetinin umytpaımyz. Maqalada aıtylǵandaı, Abaıdyń aıtqan bes dushpan men bes asyl isti bilý kerek degen irgeli oılardyń mańyzy bar. Abaıdyń taza ulttyq sıpatta jazylǵan shyǵarmalary arqyly memlekettik tildi úıretýdi qolǵa alý kerek. Abaıdyń bir óleńin jattaǵan bala, qazaqtyń sózi men óleńiniń qudiretin túsinýge jáne memelekettik tildi jetik meńgerýge ońtaıly jol bolady degen pikirge qosylamyz. Abaı – bizdiń rýhanı damýdaǵy temirqazyǵymyz ben ulttyq baǵdarymyz bolý kerek», - dep qorytyndylady spıker.