«Júrerge jol joq». Almaty irgesindegi Abaı aýylyndaǵy ortaq kóshe jer telimi retinde jekemenshikke satylyp ketken. Sonyń kesirinen turǵyndar ózi jamap-jasqap otyrǵan jolynan aıyrylyp qalǵan. Jer ıesiniń de qujaty túgel. Sondyqtan jan-jaǵyn qorshap, qurylysty bastap ketken. Al úıine kirip-shyǵýy muńǵa aınalǵan jurt endi kimge shaǵym aıtaryn bilmeı otyr, dep habarlaıdy aqshamnews.kz KTK telearnasyna silteme jasap.
Abaı aýylynyń turǵyndary jerdiń satylǵany týraly jańalyqty osydan bir aı buryn estigen. Iesi aýmaǵyna birden tas tógip, jan-jaǵyn qorshaýǵa alypty. Bes kóshemen qıylysyp jatqan ortalyq kósheni endi halyq aınalyp ótýge májbúr.
Al aınalyp ótetin ekinshi joldyń sıqy da jaman. Dál ortasynda kesilgen aǵash dińkeleri men dóń bar, al mańaıy shóp-shalań. Jurt: «atqaminerler, eń bolmaǵanda, osy joldy tegistep berse» deıdi.
- Osy jer jol bolyp turdy. Bes kósheniń toǵysy boldy. Jan-jaqtan keletin kóshelerdiń bári osy kósheden toǵysady. Mektepke baratyn jol da osy bolatyn. 13 jyl boıy bos jatqan jer bir kúnde, bir aıdyń ishinde belgisiz bir sebeptermen qorshaldy. Halyq sol Moldaǵulova kóshesin ashý úshin aqsha jınaý kerek pe? Ne sebepti halyq bul kóshede jabaıy ósken aǵashtyń dińkesin alý kerek?! - dep shaǵymdandy aýyl turǵyny Márıam Aıapova.
Jol joq, ne aldynda da, ne artynda jol joq. Bárin bekitip tastaǵan. Biz qazir ıirlep-ıirlep, áıteýir bir jerden tesik taýyp baramyz, baratyn jerimizge. Sonda myna jer qalaı ǵana satylyp tur?! Áleýmettik,, halyqtyń júrip-turatyn jerin bir jeke adam ózine ala sala ma?!, - dep ashyndy Rahmetolla Qazdanuly.
«Tar jolǵa tańyldyq» degen turǵyndar aýylda, ásirese, kólikpen qatynaý qıyndady deıdi. Jedel járdem shaqyrsa, kólik úıdiń mańaıyna da kele almaıdy eken.
-Balalarymyz sabaqqa barady. Mine, qyrkúıek te kelip qaldy. Myna jerde dóń jatyr, balalar óte almaıdy. Bala-shaǵamyzǵa sol joldy durystap berseńizder degen ótinishimiz bar. Sosyn mynaý shashyp tastaǵan nárseden júre almaı jatyrmyz Jedel járdem kóliginiń kelýi de qıyndady, -deıdi aýyl turǵyny Aıman Tátıeva.
Al kópke ortaq joldy satyp alǵan adam jurttan bosqa dúrlikpeýdi surady. «On sotyq jer ýchaskesin zańdy túrde satyp aldym» degen ol, barlyǵyn sotta dáleldeýge daıyn.
Meniń shekaram mine, mine. Myna baǵana tur ǵoı sodan bylaı qaraı meniń shekaram. Ana úı de zańsyz, myna úı de zańsyz. Barlyǵy jolǵa kirip alǵan. Sotqa berse, bere bersin. Bul jer, negizi, 2011 jyly alynǵan, 2019 jyly men satyp aldym. Bul jerdegi túsinbegen adamdar meni ákimmen baılanysy bar deıdi, al men ákimniń kim ekenin bilmeımin de, - dedi jer ıesi Ásıa Joldasova.
Atqaminerler halyqtyń máselesinen habardar. Tek qaısysynyń jeri zańdy, qaısysy zańsyz, ol jaǵyn bilmeıdi. Dese de aldaǵy eki aptada arnaıy maman shaqyryp, jaǵdaıdy retke keltirýge ýáde berdi.
Amantaı Terlikbaev, Raıymbek aýyl okrýgi ákiminiń orynbasary:
-Tústen keıin myna bos jerge tehnıka kirgizip, joldy ashyp, qoldanysqa beremiz. Ýaqytsha, qazir bere turamyz. Aldymen jolyn ashyp bereıik, sodan anyq-qanyǵyn anyqtap, sosyn josparlaımyz. Komısıa shyǵyp, myna kirip ketken úılerdi geodezıst shaqyryp, qazyqtaryn qaqtyryp, habarlama taratyp beremiz.
Biraq buǵan halyqtyń senimi az. Óıtkeni ákim «ázirge júrip-turýǵa jaraıtyn joldy rettep beremiz» dep, buǵan deıin de ýáde beripti. Sondyqtan jurt olardan qaıyr bolmasa, sotqa júginemiz dep otyr.