Elimizdegi Ulttyq ulan áskerı bólimderi men áskerı qyzmetshileri birneshe memlekettik mańyzy bar mindetterdi atqarady. Solardyń qatarynda Almaty qalasyndaǵy 3650 áskerı bólim de bar. Bul bólim de elimiz úshin asa mańyzdy memlekettik jáne strategıalyq nysandardy kúzetedi.
Osy áskerı bólimde qyzmet atqaryp júrgen, áskerı mamandyqty bala kezinen armandap, ata jolyn ustanyp, Otanyn qorǵaýdy maqsat tutqan qaraýyl bastyǵynyń kómekshisi kishi serjant Erlan Bashtybaevpen kezdesip, áńgimelesken bolatynbyz.
Erlan Berikbaıuly irgemizdegi Jetisý oblysyna qarasty N.Esebolat aýylynda dúnıege kelgen. Onyń sportqa qyzyǵýshylyǵy da júregine sonaý bala kúninde qonaqtaǵan. 2005 jyly Taldyqorǵandaǵy ekonomıkalyq-tehnıkalyq kolejine oqýǵa túsedi. Ol jastaıynan İshki ister organynda qyzmet atqarǵan atasynyń qasynda júrip keýdesine Otanǵa, elge, jerge degen mahabbatty ornyqtyra bildi. Oqýdy jaqsy aıaqtap, sol aımaqta ornalasqan Úsharal qalasyndaǵy 40398 áskerı bólimge áskerı boryshyn óteýge keledi. Jaýyngerlik qyzmetpen qatar sportty da birge alyp júrgen Erlan sambodan ótken jarystarda kóptegen jetistikke jetip kózge túsedi.
Áskerı boryshyn abyroımen ótep kelgen soń, mamandyǵy boıynsha kóptegen jerde qyzmet atqarady. Biraq bala kezdegi armany júregine tynyshtyq bere qoımaıdy. Sóıtip ata tárbıesin kórip ósken ul 2011 jyly 3650 áskerı bólimine kelisimshart qyzmetkeri bolyp sarbaz atqysh laýazymyna taǵaıyndalady. Qazirgi kúni áskerı bólimde bolyp jatqan jaýyngerlik, sporttyq sambo kúresinen bolatyn jarystarǵa qatysyp, joǵarǵy kórsetkishter kórsetip keledi. «Ońtústik» óńirlik qolbasshylyǵy jáne áskerı bólim basshylyǵy tarapynan kóptegen gramota, alǵys hattarmen marapattalǵan. Jaýyngerlik qyzmettegi qyraǵylyǵy úshin «Qoǵamdyq tártipti saqtaǵany úshin» tós belgisimen de nagradtalǵan.
Al byltyr aǵa maman-qaraýyl bastyǵynyń kómekshisi laýazymyna taǵaıyndaldy. Asyl jar úsh qyzdyń ákesi.
– Qaraýyldyq qyzmet – kez-kelgen adamnyń qolynan kele bermes sharýa. Sebebi 12 saǵat boıy kirpik qaqpaı, tikesinen tik turyp, óziniń jaýapkershiligine berilgen aýmaǵy men beketin qorǵaý jáne qadaǵalaý – úlken mindet. Sondyqtan kún saıyn qolyna qarý ustap, jaýyngerlik tapsyrmany oryndaý úshin tek shydamdy, moraldyq-psıhologıalyq ahýaly myǵym, qyraǵy, batyl, sergek te zerek dep tanylǵan úzdik kelisimshart qyzmetkerleri taǵaıyndalady. Memlekettik mańyzdy nysandy qorǵaıtyn jáne kúzetetin kelisimshart qyzmetkeri túrli psıhologıalyq test tapsyryp, fızıkalyq sharttarǵa sáıkes kelýi kerek. Sondyqtan olar jaýyngerlik qyzmetke kelgennen bastap ózderiniń arnaıy mindetterin jáne qarýdy qalaı qoldaný kerektigin, jaýyngerlik daıyndyqtaryn arttyryp otyrady. Qarýdy qalaı qoldaný kerektigin jatqa bilý jáne ony shynaıy jaǵdaıda qoldaný árkimniń qolynan kele bermeıtin is desek te bolady. Óz qarýyn avtomatty túrde qoldana bilý úshin aıyna eki ret kúndiz jáne túngi ýaqytta atys jattyǵýlary ótkiziledi. Atys barysynda ofıserler, kelisimshart qyzmetkerleri, sarbazdar ózderiniń komandırlerimen birge qaýipsizdik sharalaryn saqtaı otyryp, qaraýyldyq qyzmetke tikeleı qatysy bar ártúrli jattyǵýlardy oryndaıdy. Bizdiń 3650 áskerı bóliminiń sarbazdary, serjanttary jáne ofıserleri megapolıstiń tynyshtyǵy hám qaýipsizdigi úshin qaı kezde de sapta turady, – deıdi kishi serjant Erlan Bashtybaev.