Qasym-Jomart Toqaev pen Shavkat Mırzıóev Qazaqstan men Ózbekstannyń Joǵary memleketaralyq keńesiniń birinshi otyrysyna qatysty
Keńes otyrysynda eki eldiń saýda-ekonomıka, kólik-tranzıt, sý sharýashylyǵy jáne energetıka, mádenı-gýmanıtarlyq salalardaǵy yntymaqtastyǵyn keńeıtýdiń basym baǵyttary talqylandy.
Memleket basshysy Qasym-Jomart Toqaev qazaq-ózbek qatynasy strategıalyq seriktestik jáne odaqtastyq rýhynda turaqty damyp kele jatqanyn atap ótip, elimiz Ózbekstanmen yntymaqtastyqty nyǵaıta túsýge aıryqsha kóńil bóletinin jetkizdi.
– Byltyr Odaqtastyq qatynastar týraly tarıhı shartqa qol qoıdyq. Búgin aldaǵy on jylǵa arnalǵan Strategıalyq áriptestikti jáne odaqtastyqty damytý baǵdarlamasyn bekitemiz. Osy mańyzdy qadamdar eki eldiń baılanysyn ilgeriletýge aıryqsha serpin beretinine senimdimin, – dedi Prezıdent.
Qasym-Jomart Toqaevtyń pikirinshe, qysqa ýaqyt ishinde ózara taýar aınalymyn bes mıllıard dollarǵa deıin jetkizip, taıaý jyldary bul kórsetkishti eki eseleýge elderimizdiń áleýeti jetedi.
– Aýyl sharýashylyǵy, mashına jasaý, energetıka, komýnıkasıa, sıfrlandyrý sekildi perspektıvti salalardaǵy yntymaqtastyq áleýetin tolyq paıdalaný mańyzdy. Bul rette qazaq-ózbek shekarasyndaǵy «Ortalyq Azıa» Halyqaralyq ónerkásip kooperasıasy ortalyǵyn tezirek iske qosý qajet. Memleketaralyq keńes pen Óńiraralyq yntymaqtastyq forýmynyń qyzmetinen de eleýli nátıje kútemiz. Óńirlik kooperasıaǵa zor úmit artamyz. Qazirgi kezde jalpy somasy 3 mıllıard dollardan asatyn 70-ke jýyq birlesken jobamyz bar. Onyń aıasynda 14 myń jumys orny ashylady. Biz bul baǵyttaǵy baılanystardy odan ári nyǵaıtyp, bıznes úshin qolaıly jaǵdaı jasaýǵa ázirmiz, – dedi Prezıdent.
Sonymen qatar Qasym-Jomart Toqaev kólik-tranzıt artyqshylyqtaryn barynsha tıimdi paıdalaný mańyzdy ekenin aıtty. Bul rette Memleket basshysy tarıfterdi ońtaılandyrý, ákimshilik rásimderdi jeńildetý jáne júk jetkizý merzimin qysqartý jóninde birlesken sharalar qabyldaý qajet ekenine nazar aýdardy.
Budan bólek, Memleketaralyq keńes otyrysy barysynda transshekaralyq ózenderdiń sý resýrstaryn keshendi ári rasıonaldy paıdalaný, mádenı-gýmanıtarlyq yntymaqtastyqty nyǵaıtý máseleleri qozǵaldy.
Óz kezeginde Ózbekstan Prezıdenti Qazaqstanǵa jasaǵan bul jolǵy memlekettik saparynyń nátıjesinde strategıalyq seriktestik pen odaqtastyq múldem jańa deńgeıge kóteriletinine senim bildirdi.
– Búgin biz Joǵary memleketaralyq keńestiń birinshi otyrysyn ashyp otyrmyz. Bul, shyn máninde, ekijaqty qatynastar tarıhyndaǵy aıtýly oqıǵa. Búgingi kelissózder bizdiń naqty baǵyttar boıynsha yntymaqtastyǵymyzdy odan ári keńeıtýge, sondaı-aq dostas ári baýyrlas halyqtarymyzdyń ósip-órkendeýine yqpal etetinine senimdimin, – dedi Shavkat Mırzıóev.
Ózbek eli basshysynyń aıtýynsha, sapar aldynda Memleketaralyq komısıanyń otyrysy, Bıznes forým jáne birqatar mádenı is-sharalar ótti. 2034 jylǵa deıingi Strategıalyq áriptestik pen odaqtastyq baǵdarlamasy ázirlendi. Syrtqy saıasat vedomstvolary basshylarynyń jetekshiligimen keńes qurylyp jatyr. Munyń bári ekijaqty yqpaldastyqtyń nyǵaıýyna oń septigin tıgizedi.
Keńes barysynda taraptar eki eldiń parlamentteri, úkimetteri, syrtqy saıasat vedomstvosy jáne salalyq mınıstrlikteri arasyndaǵy baılanystardy arttyra túsý mańyzdy ekenine nazar aýdardy. Sondaı-aq halyqaralyq jáne óńirlik qurylymdar, sonyń ishinde BUU, Dúnıejúzilik saýda uıymy, Ortalyq Azıa memleketteri basshylarynyń konsýltatıvtik kezdesýleri jáne «Ortalyq Azıa plús» formaty aıasynda bir-birine qoldaý bildirýge ýaǵdalasty.
Jıynda Qazaqstan Respýblıkasy Premer-Mınıstriniń orynbasary Serik Jumanǵarın, Ózbekstan Respýblıkasy Premer-mınıstriniń orynbasary Jamshıd Hodjaev, Qazaqstan Respýblıkasynyń Kólik mınıstri Marat Qarabaev, Ózbekstan Respýblıkasynyń Kólik mınıstri Ilhom Makhamov, Qazaqstan Respýblıkasynyń Energetıka mınıstri Almasadam Sátqalıev, Ózbekstan Respýblıkasynyń Energetıka mınıstri Jýrabek Mırzamahmýdov, Qazaqstan Respýblıkasynyń Sý resýrstary jáne ırrıgasıa mınıstri Nurjan Nurjigitov, Ózbekstan Respýblıkasynyń Sý sharýashylyǵy mınıstri Shavkat Hamraev, Qazaqstan Respýblıkasynyń Mádenıet jáne aqparat mınıstri Aıda Balaeva, Ózbekstan Respýblıkasynyń Mádenıet mınıstri Ozodbek Nazarbekov, Qazaqstan Respýblıkasynyń Ǵylym jáne joǵary bilim mınıstri Saıasat Nurbek, Ózbekstan Respýblıkasynyń Joǵary bilim, ǵylym jáne ınovasıa mınıstri Kongratbaı Sharıpov baıandama jasady.
Keńes otyrysynyń qorytyndysy boıynsha birqatar sheshimge qol qoıyldy.