2024 jyl elimizdegi eń alǵashqy mýzykalyq teatr úshin erekshe mańyzǵa ıe - Abaı atyndaǵy qazaq ulttyq opera jáne balet teatryna 90 jyl. Bıylǵy jyldy tek teatr emes, álemdik sahnada ózine tán bedeli bar teatr dırıjeri Renat Salavatuly Salavatovtyń 75-jyldyq mereıtoıymen de qarsy aldy, dep habarlaıdy aqshamnews.kz
2024 jyldyń 10 qarashasynda maestro Renat Salavatovtyń mereıtoıyna oraı teatrda P. I. Chaıkovskııdiń «Iolanta» operasy qoıyldy. Dırıjerlik púlt tizgininde mereıtoı ıesi – Tatar KSR-niń halyq ártisi, Qazaqstannyń eńbek sińirgen qaıratkeri, Reseıdiń eńbek sińirgen ártisi, Tatarstan Respýblıkasynyń Memlekettik syılyǵynyń laýreaty, Qurmanǵazy atyndaǵy Qazaq ulttyq konservatorıasynyń jáne Qazaq ulttyq óner ýnıversıtetiniń qurmetti profesory Renat Salavatov ózi boldy.
Teatr maestrony mereıtoıymen quttyqtap, teatrdyń 90 jyldyq mereıtoıyna arnalǵan estelik medal men saǵatty tabys etti.
Salavatov esimi joǵary deńgeıdegi mýzyka men klasıkalyq repertýardy tereń túsinýdiń sınonımi. Maestromyzdyń repertýarynda eýropalyq, orys, tatar jáne qazaq kompozıtorlarynyń 130-dan astam opera, balet jáne sımfonıalyq shyǵarmalary bar.
Renat Salavatov Abaı atyndaǵy Qazaq ulttyq opera jáne balet teatrynyń sımfonıalyq orkestrin ártúrli ýaqyttarda basqarǵan. Ol Musa Jálel atyndaǵy Tatar teatrynyń bas dırıjeri. Kezinde Keńes Odaǵynyń eń tanymal orkestrlerimen, sonyń ishinde Úlken teatr men Marıın teatrynyń orkestrlerimen birge jemisti jumys istegen.
Parıjdegi Grand Operada, Dýblın baletiniń orkestrimen, London orkestrimen, sondaı-aq Boloná, Bırmıngem, Salerno, Keln, Dýısbýrg, Sevılá, Amsterdam, Nú-Iork qalalarynda gastróldik saparlarymen baryp, óner kórsetip, kópshiliktiń yqylasyna bólengen. Maestro on jyl boıy Bavarıa memlekettik operasynda, odan keıin Shvesıanyń Koróldik operasynda da qyzmet etti.
«Iolanta» — G. Gerstiń «Rene patshanyń qyzy» dramasyna negizdelgen, Petr Ilıch Chaıkovskııdiń 1891 jyly jazylǵan eń sońǵy ári eń jarqyn operasy. Bul shyǵarma adamnyń adaldyqqa, shynaıy azattyqqa degen umtylysyn aıryqsha beıneleıdi. Sújet jelisi dúnıege kelgen sátinen kóz janarynan aıyrylǵan hanshaıym Iolanta aınalasynda órbıdi. Óziniń kórý múmkindigi shekteýli ekenin bilmegen ol, basqa adamnyń kómegimen ómir men mahabbattyń shynaıy mánin túsinedi.
Spektákl ártisteri, ásirese maestro kesh sońynda kórermenniń ystyq yqylasyna bólendi. Al ár qonaq osy qaıtalanbas emosıa men shattyq sezimi taǵy da uzaǵyraq sozylsa eken degen shynaıy tilekpen shapalaqtaryn uzaǵyraq soqqan sekildi.