Ótken jyly ataýly áleýmettik kómek alǵan 50,9 myń otbasy memlekettik qoldaý sharalarynyń arqasynda kedeılik jaǵdaıynan shyqty.
Atalǵan kezeńde jalpy somasy 39,5 mlrd teńgege 78,1 myń otbasyndaǵy 413,7 myń adamǵa AÁK berildi, dep habarlaıdy aqshamnews.kz.
Ótken jyldyń qorytyndysy boıynsha óńirlik bóliniste AÁK alýshylardyń eń kóp sany Túrkistan oblysynda – 15,8 myń otbasy (20,3%), Shymkent qalasynda – 8,8 myń otbasy (11,3%), Almaty oblysynda – 6,1 myń adam otbasy (7,8%), Qyzylorda oblysynda – 6,4 myń otbasy (8,1%) boldy.
AÁK alýshylar eń az óńirlerdiń ishinde Ulytaý oblysy – 363 otbasy (0,5%), Atyraý oblysy – 840 otbasy (0,9%), Soltústik Qazaqstan oblysy – 1,2 myń otbasy (1,5%).
AÁK alýshylardyń qurylymynda basym kópshiligi balalardyń úlesine – 66,6% nemese 275,5 myń adam; jumys isteıtin azamattar – 17,8% nemese 59,8 myń adam; balalardy, qarttardy jáne múgedektigi bar adamdardy kútetin adamdar – 12,2% nemese 50,3 myń adam; qalǵan 3,4% azamattardyń basqa sanattaryna tıesili.
AÁK-niń negizgi maqsaty – aqshalaı tólemder túrindegi qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý.
AÁK mynalardy kózdeıdi:
- tabysy kedeılik sheginen aspaıtyn azamattarǵa toqsan saıyn áleýmettik kómek taǵaıyndaý;
- tabysy az otbasylardaǵy 1 jas pen 6 jas aralyǵyndaǵy ár balaǵa 1,5 AEK mólsherinde aı saıynǵy qosymsha tólem berý.
- jumysqa ornalastyrý, óz isin ashýǵa nıetti otbasylarǵa granttar berý, oqýǵa jiberý jáne taǵy basqalar arqyly jumyspen qamtýǵa járdemdesý..
Mysaly, Shyǵys Qazaqstan oblysy Óskemen qalasynyń turǵyny Nurgúl Dýanova memlekettik qoldaý sharalary aıasynda oqýdan ótip, mamandyq alyp, tabysty jumysqa ornalasty. Nátıjesinde Nurgúldiń súıikti isi tabys ákeletin jumysqa aınaldy.
«Bizdiń úlken otbasymyz 2020-2024 jyldar aralyǵynda ataýly áleýmettik kómek alatyn. Sodan keıin men «kondıter» mamandyǵy boıynsha kásiptik oqytý kýrstarynan óttim. Oqýdy aıaqtaǵannan keıin 2024 jyldyń tamyz aıynda men «Happy Cake» kondıterlik sehyna jumysqa turdym, onda osy kúnge deıin jumys isteımin», – dedi Nurgúl Dýanova.
2025 jyldyń 1 qańtarynan bastap AÁK-ke úmitker otbasylardyń materıaldyq jaǵdaıyn tekserýdi júzege asyratyn ýchaskelik komısıalardyń qyzmetin sıfrlandyrý úshin mobıldi qosymsha engizildi. Bul shara áleýmettik kómek taǵaıyndaý týraly sheshim shyǵarý kezinde sybaılas jemqorlyq táýekelderin azaıtýǵa, sondaı-aq ótinish berýshiniń turǵylyqty jerin anyqtaýǵa jáne onyń materıaldyq jaǵdaıyn sýretke túsirýge baǵyttalǵanyn aıta keteıik.