Bıyl ult ustazy, memleket jáne qoǵam qaıratkeri, ǵalym-reformator Ahmet Baıtursynulynyń týǵanyna 150 jyl toldy.
Almaty qalasy mádenıet basqarmasynyń qoldaýymen A. Baıtursynuly mýzeı-úıine kúrdeli jóndeý júrgizilip, ekspozısıasy jańartyldy, dep habarlaıdy Almaty-akshamy.kz
HH ǵasyrdyń uly reformatory, qoǵam jáne memleket qaıratkeri, lıngvıs-ǵalym, qazaq fılologıa ǵylymynyń negizin qalaýshy, aqyn-aýdarmashy, túrkitanýshy Ahmet Baıtursynulynyń mýzeı-úıi 1993 jyly ashyldy. Mýzeı-úıdiń janyndaǵy A. Baıtursynulynyń bústi 1998 jyly ornatylǵan.
Almaty qalasy ákiminiń 2021 jylǵy 13 qazandaǵy №4/508 qaýlysymen mýzeı-úı jeke menshikten Almaty qalasynyń komýnaldyq menshigine berildi.
Jańarǵan mýzeı-úı úsh ekspozısıalyq jáne bir dáris zalynan turady. Qazirgi ýaqytta mýzeıde ǵalymnyń ómiri men shyǵarmashylyǵy týraly 500-ge jýyq eksponat jınaqtalǵan. Bul – memlekettik arhıvten alynǵan túpnusqa qujattar, jeke jáne ujymdyq fotosýretter.
Mýzeı zamanaýı tehnologıalarmen jabdyqtalyp, jańa mazmunmen toltyrylyp, jańa sıpat aldy. Arnaıy sensorly taqtalarda mýzeı-úıdiń qurylý tarıhy, arhıvtik materıaldar, fotosýretter jáne reformatordyń ómiri men shyǵarmashylyq joly týraly mol maǵlumat beretin qundy málimetter bar.
Mýzeı-úı dúısenbiden basqa kúnderi saǵat 10.00-den 19.00-ge deıin kelýshiler úshin ashyq.
Mýzeıdiń mekenjaıy: Almaty qalasy, Baıtursynuly kóshesi, 60.
A. Baıtursynulynyń mýzeı-úıi.
Baılanys tel.: +7 747 836 76 06.
e-mail: museumalmaty@mail.ru.