Qurmanǵazy atyndaǵy qazaq ulttyq halyq aspaptar orkestriniń mereıtoılyq 90-shy maýsymy keń kólemde atalyp ótpek. Ulttyq dombyra kúni men halyq kompozıtory Qurmanǵazy Saǵyrbaıulynyń 205 jyldyǵy qarsańynda orkestr birqatar aýqymdy qoıylymdar josparlaýda, dep habarlaıdy almaty-akshamy.kz
Orkestrdiń repertýary týraly Óńirlik komýnıkasıalar qyzmetiniń brıfıńinde Qurmanǵazy atyndaǵy qazaq ulttyq halyq aspaptar orkestriniń dırektory Medet Qýanyshev pen bas dırıjer Abylaı Tilepbergen aıtyp berdi.
«Bıylǵy jyldy biz Qurmanǵazy Saǵyrbaıulynyń 205 jyldyǵyn merekeleýden bastadyq. Ulttyq jáne álemdik klasıka týyndylary, sondaı-aq mýzyka sheberi, halyq kompozıtory Qurmanǵazynyń úzdik týyndylary oryndalǵan aýqymdy konsert uıymdastyryldy. Árbir uıymdastyrylǵan is-shara Qurmanǵazy Saǵyrbaıulynyń 205 jyldyǵy men ulttyq orkestrdiń 90 jyldyǵyn merekeleý aıasynda ótýde», - dedi M.Qýanyshev.
Osy konserttik maýsymdy shyǵarmashylyq ujym Italıa qalalary boıynsha «Kóshpendiler áýeni» (Kóshpendiler áýeni) atty gastróldik týr barysynda ashqanyn atap ótken jón.
«Biz 90-shy maýsymdy Rımdegi (Italıa) halyqaralyq gastróldik konsertimizben ashtyq. Rımnen basqa biz Neapol men Florensıa qalalaryna bardyq. Jergilikti kórermender qazaq mýzykasynyń erekshe dámine tánti bolyp, jyly lebizderi men quttyqtaýlaryn bildirdi», - dep tolyqtyrdy spıker.
Ulttyq dombyra kúninde (bıyl 2 shildede atap ótiledi) orkestr respýblıka astanasynda uıymdastyrylatyn is-sharalarǵa qatysady. Orkestr ujymyndaǵylar eki mereıtoıdy eskere otyryp, arnaıy qoıylymdar daıyndalatynyn atap ótti.
«Bıyl Dombyra kúnine arnalǵan konserttik baǵdarlama Qurmanǵazy atyndaǵy orkestr men N.Tilendıev atyndaǵy «Otyrar sazy» akademıalyq orkestriniń qatysýymen ótedi. Kórermender elimizde tanymal dırıjerlerdiń jetekshiligimen tanymal ártisterdiń, sonyń ishinde Aıtqalı Jaıymov, Dinzýhra Tilendıeva, Rýslan Baımýrzın jáne basqalardyń ónerlerin tamashalaı alady. Baǵdarlamanyń basty erekshelikterniniń biri - solaqaı dombyrashylardyń óner kórsetýi bolady, óıtkeni ádette bul aspapta oń qolmen oınaıdy. Sondaı - aq, Halyq ártisteri Seken Turysbekov, Erlan Rysqalı jáne Aıgúl Qosanova óner kórsetedi dep kútilýde», - dedi orkestrdiń bas dırıjeri Abylaı Tilepbergen.
Sonymen qatar, shyǵarmashylyq ujym alǵashqy ulttyq orkestrdiń tarıhyn baıandaıtyn birqatar beınematerıaldar men kitap shyǵarýǵa nıetti.
«Biz orkestrdiń ǵasyrlyq tarıhyn ártúrli beınematerıaldarda, kitap basylymdarynda túsirip, orkestrdiń búgingi kúnge deıingi damý tarıhy jaıly aıtyp bergimiz keledi. Bastaýynda turǵan mýzykanttarmen, dırıjerlermen tanystyrsaq deımiz. Qazirgi ýaqytta biz muraǵattyq materıaldarmen jumys istep jatyrmyz. Konserttik ómirden bos ýaqytty osy jumysqa arnaımyz», - dedi A. Tilepbergen.
Qurmanǵazy atyndaǵy Qazaq ulttyq halyq aspaptar orkestrin 1934 jyly akademık Ahmet Jubanov qurdy. Ujymda búginde 90-ǵa jýyq mýzykant bar, olardyń repertýarynda 4000 týyndy bar.