UBT tapsyrý ýaqyty 40 mınýtqa uzartyldy.
Qazaqstanda UBT bastalǵannan beri 90 myńnan astam talapker test tapsyrdy, dep habarlaıdy Almaty-akshamy.kz BǴM baspasóz qyzmetine silteme jasap.
Onyń ishinde túlekterdiń 74,7%-y qazaq tilinde, 25,2%-y orys tilinde, 0,1%-y aǵylshyn tilinde testileýden ótti.
UBT bastalǵaly shekti baldy 67%-ǵa jýyq talapker jınady. Ortasha balǵa keletin bolsaq, ol 65 bal.
Talapkerlerdiń, sonyń ishinde erekshe bilim berý qajettilikteri bar talapkerlerdiń testileýdi yńǵaıly tapsyrýy úshin UBT tapsyrý ýaqyty 40 mınýtqa uzartyldy. Sonymen qatar, olar úshin syzba jáne dıagramlarsyz suraqtar jasaldy. Qabyldanǵan sharalar arqasynda erekshe bilim berý qajettilikteri bar testilenýshiler sany artyp keledi. Eger 2021 jyly negizgi UBT-ǵa 90 bala qatyssa, bıyl úsh apta ishinde testileýge erekshe bilim berý qajettiligi bar 310 bala qatysty.
Jalpy, negizgi ulttyq biryńǵaı testileýge qatysýǵa 290 myńǵa jýyq ótinish kelip tústi. Esterińizge sala keteıik, memlekettik bilim berý grantyn taǵaıyndaý konkýrsyna qatysý úshin UBT 16 mamyrda bastalyp, 2022 jylǵy 5 shildege deıin jalǵasady. Bul rette talapkerler testileý orny men ýaqytyn ózderi tańdady.
Bıyl talapkerlerge yńǵaıly bolý úshin alǵash ret UBT-nyń kúnin, ýaqytyn, orny men beıindik pánderin eske salatyn SMS joldanatyn bolady. Habarlama UBT-ǵa qatysýshylardyń ózderine, sondaı-aq kámelettik jasqa tolmaǵan testilenýshilerdiń ata-analaryna nemese zańdy ókilderine jiberiledi.
Akademıalyq adaldyqty saqtaý maqsatynda talapkerlerdiń test nusqasy tańbalandy. Iaǵnı UBT-nyń árbir qatysýshysynyń jeke test nusqasy bolady. Erejelerdi buzǵan jáne test tapsyrmalaryn aýdıtorıadan shyǵarýǵa talpynǵan jaǵdaıda Ulttyq testileý ortalyǵy ereje buzýshylardy anyqtap, olardyń nátıjelerin joıady.
119 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorıadan 118 adam shyǵarylyp, olardyń nátıjeleri joıyldy.
Esterińizge sala keteıik, UBT-ǵa kirgizý úsh deńgeıli júıe boıynsha júzege asyrylady: Face ID jeke basyn sáıkestendirý arqyly, jeke kýálik boıynsha, sondaı-aq otyrǵyzý ornynda jeke basyn sáıkestendirý júrgiziledi. Bıyl testileý «1 kompúter – 2 kamera – 1 testilenýshi» qaǵıdaty boıynsha ótedi. Eger buǵan deıin testileý prosesin ár kompúterdiń joǵarǵy jaǵynan baqylap otyratyn bir kamera ǵana bolsa, endi testilenýshiniń jeke basyn sáıkestendirýge jáne bógde adamdardyń kirýine jol bermeýge múmkindik beretin ekinshi (frontaldy) kamera ornatylǵan.
«Ótken jyly Face-ID júıesi men baqylaýdy kúsheıtýdiń nátıjesinde bógde adamdardy kirgizýge tyrysqan 18 jaǵdaı anyqtaldy. Bıyl biz alǵash ret bógde adamdardy kirgizýge tyrysý faktisin tirkedik. UBT-nyń úshinshi aptasynda qatysýshy óziniń ornyna basqa tulǵany jibergen. UBT-ǵa kirgizý barysynda Face-ID jeke basyn sáıkestendirý júıesi bógde adamdy anyqtady. Tıisti is-sharalar qabyldandy, testilenýshi men testileýge kirýge talpynǵan bógde tulǵa boıynsha derek quqyq qorǵaý organdaryna jiberiledi», – dep atap ótti BǴM Ulttyq testileý ortalyǵynyń dırektory Rýslan Emelbaev.
Aıta keteıik, talapkerler testileý aıaqtalǵannan keıin 30 mınýt ishinde apelásıaǵa bere alady. Sertıfıkat apelásıa týraly sheshim qabyldanǵannan keıin testilenýshiniń jeke kabınetinde qoljetimdi bolady.