Atamnyn Amanaty qoǵamdyq birlestigi Uly Otan soǵysynyń maıdan dalasynda qaza tapqan Kádirbek Dáýletqulovtyń súıegin kindik qany tamǵan týǵan jerine qaıta jerleý úshin Jambyl oblysyna jetkizdi. Bul úshin Qazaqstan Qarýly kúshteri Áýe qorǵanysy kúshteriniń áskerı-kóliktik ushaǵy arnaıy reısti júzege asyrdy.
Qazaqstandyq jaýyngerdiń súıegin qarsy alýǵa arnalǵan rásim Taraz qalasy áýeaılaǵynyń áskerı sektorynda áskerı orkestrdiń oryndaýyndaǵy marshtyń súıemeldeýimen barlyq áskerı rásimderdi saqtaı otyryp uıymdastyryldy, dep habarlaıdy almaty-akshamy.kz.
İs-sharaǵa Jambyl oblysynyń qorǵanys isteri jónindegi departamentiniń, «Ońtústik» óńirlik qolbasshylyǵy áskerleriniń jáne ardagerler uıymdarynyń ókilderi qatysty.
Jambyl oblysynyń týmasy Kádirbek Dáýletqulovtyń súıegin 2023 jyldyń qarasha aıynda Reseıdiń «Áýlıe Ilá Mýromes zastavasy» izdeý jasaǵy tapqan bolatyn. İzdeýshiler súıektiń kimge tıesili ekenin medalóndaǵy derekter arqyly anyqtaı alǵan.
– Kádirbek Dáýletqulov týraly kóptegen áskerı aqparat qupıa. Óıtkeni ol Keńes Armıasy qatarynda shekarashy qyzmetin atqarǵan, – dep atap ótti Atamnyn Amanaty qoǵamdyq birlestiginiń ókili Ábýbákir Smaıylov. – Onyń 1920 jyly Jambyl oblysynda týǵany, 1943 jyldyń jazynda Kýrsk doǵasyndaǵy qandy shaıqasta qaza tapqany belgili.
Qoǵamdyq birlestik ókilderi anyqtaǵandaı, Kádirbek Dáýletqulov úılenbegen. Qaza tapqan jaýyngerdiń Jambyl oblysynda turǵan aǵasynyń urpaqtary tabyldy. Týǵan jeri – Turar Rysqulov aýdanynda jer qoınyna tapsyrý úshin sarbazdyń súıegi týystaryna tapsyryldy. Sondaı-aq onyń medalóny, kaskasy, saper kúregi jáne sarbaz krýjkasy da aǵaıyndaryna berildi.
Jaýyngerdiń súıegin tapsyrý rásimi Jeńis qalalyq saıabaǵynda ornalasqan «Dańq» jaýyngerlik dańq zalynda jalǵasty. Ońtústik óńirdiń áskerı qyzmetshileri men qurmetti qaraýyl rotasynyń sarbazdary sońǵy qurmet kórsetti. Kádirbek Dáýletqulovtyń týystary is-sharany uıymdastyrýshylarǵa shynaıy alǵysyn jetkizdi.
– Soǵys bastalǵanda Kádirbek aǵamyz nebári 21 jasta eken. Ol, tipti, shańyraq kóterip te úlgermepti, – dedi jaýyngerdiń nemere qaryndasy Orazkúl Dáýletqulova. – Alaıda biz ol kisi týraly úzdiksiz aqparat izdegen týystarymyzdan biletin edik. Endi, mine, 80 jyldan soń týysqanymyzdyń súıegi týǵan Otanyna oralyp otyr. Biz izdestirý uıymdaryna, sondaı-aq aǵamyzdyń súıegin týǵan jerine jetkizgen áskerı qyzmetshilerge rızamyz.
Atamnyn Amanaty qoǵamdyq birlestigi 2019 jyldan bastap Uly Otan soǵysy jyldarynda qaza tapqan qazaqstandyq jaýyngerlerdi júıeli túrde izdeýmen jáne jerleýmen aınalysyp keledi. Qoǵamdyq birlestik osy ýaqytqa deıin Qorǵanys mınıstrligimen birlesip 19 sarbazdyń súıegin elimizge jetkizip, qaıta jerleýdi uıymdastyrdy.