QR Premer-Mınıstri Asqar Mamınniń tóraǵalyǵymen ótken Úkimet otyrysynda eldegi sanıtarlyq-epıdemıologıalyq jaǵdaı qaraldy, dep habarlaıdy almaty-akshamy.kz
Densaýlyq saqtaý mınıstri Alekseı Soı Qazaqstandaǵy sanıtarlyq-epıdemıologıalyq jaǵdaı turaqty ekenin aıtty. Barlyq óńirlerde aýrý deńgeıi, aýyr jaǵdaıdaǵylar men stasıonarlyq jáne ambýlatorıalyq em alyp jatqandar sany aıtarlyqtaı tómendedi.
Vırýstyń reprodýktıvtilik ındeksi – 0,97. Infeksıalyq tósek-oryndar júktemesi – 34%, reanımasıalyq tósek-oryndar júktemesi – 29%. Búgingi tańda koronavırýsqa qarsy vaksınanyń birinshi komponentimen 8 mln astam adam, ekinshi komponentimen 7,2 mln jýyq adam egildi.
Ujymdyq ımýnıtettiń 60%-yna qol jetkizý mindeti qoıyldy. Koronavırýstyń taralý qarqyny boıynsha «jasyl aımaqta» Shymkent qalasy, Aqtóbe, Túrkistan, Jambyl, Mańǵystaý jáne Qyzylorda oblystary, «sary aımaqta» Atyraý, Almaty, Qaraǵandy, Batys Qazaqstan jáne Shyǵys Qazaqstan oblystary ornalasqan. «qyzyl aımaqta» Almaty jáne Nur-Sultan qalalary, Aqmola, Qostanaı, Pavlodar jáne Soltústik Qazaqstan oblystary qalyp otyr.
Qazaqstanda tumaýǵa qarsy egý naýqany jalǵasýda. Qazirgi ýaqytta 1,4 mln qazaqstandyq tumaýǵa qarsy ekpe aldy. Úkimet basshysy koronavırýs pen tumaýǵa qarsy egý naýqanyn jalǵastyrýdy tapsyrdy.