Saǵatty kórmekshi bolǵanda julyp áketken
Pavlodarda 8 jasar qyzdyń telefonyn tartyp alǵan er adam halyqaralyq izdeýde júrgen. Kúdiktini polısıa qyzmetkeri ustap aldy, dep habarlaıdy Almaty-akshamy.kz Pavlodar oblysy Polısıa departamentiniń baspasóz qyzmetine silteme jasap.
Birneshe kún buryn Pavlodar qalasyndaǵy Sátbaev kóshesinde óz aýlasynda dostarymen oınap júrgen 8 jasar qyz uıaly telefonyn kúrteshesiniń qaltasynan alyp, saǵatty kórmekshi bolǵan.
«Kenetten oǵan beıtanys jas jigit júgirip kelip, telefonyn qolynan tartyp alyp, qashyp ketken. Úıinen shyǵyp kele jatqan patrúldik polısıa batalónynyń aǵa ınspektory, leıtenant Oljas Tileýbergenov kishkentaı qyzdyń kómek surap aıqaılaǵanyn estigen. Bala sońǵy kireberistiń tusynda qashyp bara jatqan jigitti kórsetken», - dedi baspasóz qyzmetinde.
Oljas Tileýbergenov dereý kúdiktiniń artynan júgirip, ony ustap alǵan. Keıin «102» nómirine qońyraý shalyp, qylmyskerdi kelgen avtopatrýlge tapsyrdy.
«Tonaýshynyń jeke basyn anyqtaǵannan keıin polısıa onyń memleketaralyq izdeýde bolǵanyn jáne sottan jasyrynyp júrgenin anyqtady. Qazir atalǵan fakti boıynsha QR QK 191-baby 1-bóligi boıynsha sotqa deıingi tergeý júrgizilýde», - dedi departamentte.
Departamenttiń habarlaýynsha, leıtenant Tileýbergenov ishki ister organdarynda 2014 jyldan beri qyzmet etip keledi. Laıyqty qyzmetten basqa, ol sporttyq sheberligi men talantymen de erekshelenedi. Qajyrly jattyǵýlar men sheberliktiń arqasynda bir aı buryn ol qoıan-qoltyq urystan İshki ister mınıstrliginiń chempıony atandy.