«Parı Sen-Jermen» klýbynyń shabýylshysy Lıonel Messı eýropalyq klýbtar úshin eń kóp gol soqqan «Al-Nasr» shabýylshysy Krıshtıaný Ronaldýdyń rekordyn jańartty. Bul týraly Ulysmedia.kz-ke silteme jasap, Almaty-akshamy.kz habarlaıdy.
Lıga 1-niń 30-shy týryndaǵy «Nıssaǵa» qarsy machta Messı eýropalyq klýbtar sapyndaǵy óziniń 702-shi resmı golyn soqty, bul tek PSJ-nyń jeńisi ǵana emes, Lıonel Messıdiń taǵy bir jeke jetistigi boldy.
Osylaısha Messı Eýropadaǵy 702-shi golyn soǵyp, bul kórsetkish boıynsha Krıshtıaný Ronaldýdan (701) asyp tústi.
Lıonel Messı — argentınalyq fýtbolshy, «Parı Sen-Jermen» komandasynyń shabýylshysy jáne Argentına quramasynyń kapıtany. Álem chempıony, Ońtústik Amerıka chempıony, Fınalıssıma jeńimpazy, Olımpıada chempıony. Ol eń tanymal jáne tabysty fýtbolshylardyń biri.
Eske sala keteıik, buǵan deıin «Barselonanyń» burynǵy oıynshysy «Astana-Arenadaǵy» kógaldy synǵa alǵan bolatyn.