Bıyl bul maqsatqa 50 mlrd teńge bólinedi.
Memleket jalgerlik aqynyń 50%-yn búdjet aqshasy esebinen óteıdi, qalǵan jartysyn otbasy óz qaltasynan tóleıdi, dep habarlaıdy Almaty-akshamy.kz
Indýstrıa jáne ınfraqurylymdyq damý mınıstrliginiń baspasóz qyzmetiniń málimetine sáıkes, bıyl turǵyn úıdiń jalǵa alý aqysyn sýbsıdıalaý tetigimen 70 myńǵa jýyq qazaqstandyq qamtylady.
Elimizde jeke turǵyn úı qoryndaǵy baspananyń jalǵa alý aqysyn sýbsıdıalaý tetigi iske asyrylyp jatyr.
"2023 jyly bul maqsatqa 50 mlrd teńge bólinbek. Sýbsıdıalaý baǵdarlamasymen 70 myńǵa jýyq adam qamtylady. Memleket osy azamattar jalǵa alǵan úıdiń jalgerlik aqysynyń 50%-yn tóleıdi", - delingen habarlamada.
Baǵdarlamaǵa qatysý úshin qazaqstandyq Otbasybank.kz platformasynda ótinish jiberýi kerek. Sýbsıdıalaýǵa ótinishter elektrondy sıfrly qoltańba (ESQ) arqyly qabyldanady.
Azamattar jalǵa beriletin turǵyn úıdi ózderi izdep, tańdaıdy. "Otbasy bank" turǵyn úıdi jalǵa alý boıynsha sýbsıdıalardy jaldaý shartynyń qoldanylý merzimi men tólemderdiń kestesine sáıkes aı saıyn tóleıdi.
Jalǵa alý tólemderi boıynsha memlekettik qoldaýǵa 4 sanatqa sáıkes turǵyn úıge kezeginde turǵan azamattar, atap aıtqanda, I jáne II toptaǵy múgedekter, múgedektigi bar balalardy tárbıelep otyrǵan otbasylar, jetim balalar jáne kóp balaly otbasylar úmitker bola alady.
Bul rette úmitker otbasylardyń keıingi 6 aıdaǵy ortasha aılyq jıyntyq tabysynyń mólsheri januıanyń ár múshesine shaqqanda eń tómengi kúnkóris deńgeıinen aspaýǵa tıis.
"Otbasy bank sýbsıdıa alýshylardyń sáıkestigine monıtorıń júrgizip, sondaı-aq aı saıyn tólem tártibin qadaǵalaıdy. Al jergilikti ákimdikter keminde toqsanyna bir ret jalǵa beriletin turǵyn úıdi tekseredi", - dedi mınıstrliktegiler.
Bul rette jaqyn týystarynan, buryn nekede turǵan jubaıynan jáne erli-zaıyptylardyń týystarynan turǵyn úıdi jalǵa alýǵa, sondaı-aq atalǵan baspanany qaıta jaldaýǵa ótkizýge tyıym salynady.