Qarıanyń kólik tizgindegenine bıyl 10 jyl boldy.
Almaty oblysy Qarasaı aýdany Áıteı aýylynyń 70 jastaǵy turǵyny Aıymgúl Erejepqyzy taksıst bolyp jumys isteıdi, dep habarlaıdy Almaty-akshamy.kz Sputnik Qazaqstan saıtyna silteme jasap.
Aıymgúl Erejepqyzy Qaraqalpaqstanda balabaqsha tárbıeshisi mamandyǵyn oqyǵan. 1997 jyly Qazaqstanǵa kelgen soń óz mamandyǵy boıynsha eńbek ete almaı, nápaqasyn ár túrli jumys istep tabady.
«Sol ýaqyttan bastap men istemegen jumys qalmady. Óz mamandyǵym boıynsha jumys tappadym. Sosyn jemis-jıdek sattym. Poıyzdarda júrip tamaq sattym. Eń aıaǵy sýǵa deıin sattym. Atyraý, Aqtóbeden kelgen jolaýshylar sýdy kóp satyp alady. Myna Túlkibastyń sýy óte dámdi. Sonda bir jarym lıtr sýdy «baklashkaǵa» quıyp alyp, 10 teńgeden satamyn. Jolaýshylar 10 bótelkeden satyp alady. Sóıtip, kún kórdik. Úkimetke qol jaımadym. Qol jaıǵanmen, jumys bolǵan joq, oǵan ókpeleýdiń esh qajeti joq», - deıdi ol.
2006 jyly Túrkistannan Almatyǵa qonys aýdarǵan kezde de Aıymgúl apa óz mamandyǵy boıynsha jumys tappaıdy. Tıyndap jınap, 30 jyl júrilgen eskileý kólik satyp alady. Aıymgúl Erejepqyzy bala kúninde ákesiniń traktoryn otaldyrǵany bolmasa, jalpy kólik tizgindep kórgen jan emes.
«Ákem traktorshy edi. Sharýa qojalyqtarynyń kerek-jaraǵyn tasıtyn. Sonymen nápaqasyn tapqan qarapaıym sharýa adamy. Sol ákem jumysqa bararda traktoryn otaldyryp qoıamyn. Negizi ózim traktorshy bolǵym keldi. Ákeme aıtyp edim, ol usynysymdy qoldamady. «Traktorshynyń aqshasy bolmaıdy, eldiń rahmetine bergenin alyp júresiń. Erteń otbasyń bolady, úıge qaraısyń ba, álde traktormen el kezip júresiń be? Qoı» dep kónbedi. Odan basqa kólik tizginine ómiri otyryp kórmeppin», - deıdi zeınetker.
Sóıtip, Aıymgúl apa mehanıka kóligin minip, jolaýshy tası bastaıdy.
«Qıyndyǵy boldy. Biraq tabandap, bar kúsh-jigerimdi salyp júrgizdim kólikti. Qolymda ol kezde eki kelinim bar. Ana uldarym kelinderime jumys isteýge ruqsat bermeıdi. «Jumys istemeńiz, otyryńyz úıde, biz baǵamyz» dep maǵan da renjıdi. Kónbedim. Bir úıde 3-4 áıel bir-birimizge qarap otyrǵansha, kásip qylaıyn dep sheshtim. Sóıtip júrip, mehanıka kóligimdi satyp, avtomatpen júretin kólik aldym. Aqshamdy jınap, balalarym da kómektesti. Ol da «Opel» markaly kólik edi. Ol kóligim gazben de, benzınmen de júre beretin. Rahat edi. Ony satyp 800 myńǵa Mitsubishi Lancer degen kólikti satyp aldym», - dep áńgimeledi qarıa.
Aıymgúl apanyń taksıst bolǵanyna bıyl 10 jyl, osy jyldar ishinde jol erejesin buzyp, keleńsizdikke kez bolmaǵan. On jyl buryn jolaýshylar taksı degendi kerek ete qoımaıtyn, al qazir kóligi bardyń dáýiri júrgen zaman.
«Alǵashqy jyldary adamdar taksıge otyrmaıtyn. Kóligimdi toqtatyp qoıyp, kún uzaqqa kútip otyramyn. Burynǵy jolaýshy ne aıtsa da, «prav» edi. 50 teńge berse de ala beremiz, 10 teńge berse de ala beretinbiz. Sol az aqshanyń ózin bergisi kelmeı, tegin jetkisi keletinder óte kóp bolǵan. Al qazir adamdar saýatty, tegin dúnıeniń joq ekenin biledi. 10 jyl buryn kúnine 1000 teńge tapsam qýanatynmyn. Biraq ondaı aqsha ońaılyqpen tabylmaıtyn. Al qazir kúnine 3000-4000 teńge tabamyn. Ózime jetedi. Kúndelikti sháı-tuzymdy satyp alamyn. Odan artyq maǵan ne kerek? Zeınetaqym bar. Allaǵa shúkir jetedi», - deıdi ol.