7 mamyr – Otan qorǵaýshylar kúni
Memleket basshysy 1992 jyly 7 mamyrda Qazaqstannyń Qarýly Kúshterin qurý týraly Jarlyqqa qol qoıdy. Otan qorǵaýshylar kúni – Qazaqstannyń Qarýly Kúshteriniń qurylǵan kúni.
1992 jyly 7 mamyrda Memlekettik qorǵanys komıteti Qazaqstannyń Qorǵanys mınıstrligi bolyp qaıta quryldy. Sol jyly Prezıdenttiń Jarlyǵymen Qazaqstannyń Qarýly Kúshteri jasaqtaldy.
Al 2012 jyly Qarýly Kúshterdiń 20 jyldyq mereıtoıy atalyp ótti. Sonyń qarsańynda 7 mamyr memlekettik merekeler tizimine qosyldy.
Qarýly Kúshterdiń qurylymy
Qazaqstannyń Qarýly Kúshteriniń quramyna qurlyqtaǵy ásker, áýe qorǵanysy kúshteri jáne áskerı-teńiz kúshteri kiredi.
Qurlyq kúshteriniń óńirlik qolbasshylyqtary 2003 jyly qurylǵan bolatyn. Olar:
"Astana" óńirlik qolbasshylyǵy;
"Shyǵys" óńirlik qolbasshylyǵy;
"Batys" óńirlik qolbasshylyǵy;
"Ońtústik" óńirlik qolbasshylyǵy.
Negizgi mindetter
Qazaqstannyń Qarýly Kúshterine beıbit kezeńde birqatar mindet júktelgen. Olar:
- áskerı kúsh pen jaýyngerlik daıarlyqty qamtamasyz etý;
- el ishindegi qaqtyǵystardy, shekarada nemese el ishindegi kez kelgen zańsyz qarýly kúshke toıtarys bere alatyndaı deńgeıde bolý;
- áýe keńistigin kúzetý, sondaı-aq memlekettik shekaranyń jedel-strategıalyq turǵyda mańyzdy óńirlerin jabý;
- mańyzdy áskerı nysandardy kúzetý;
- eldiń kez kelgen aýdanynda jaǵdaıdy turaqtandyrý jónindegi batyl is-qımylǵa ázir bolý;
- halyqaralyq mindettemelerge sáıkes bitimgershilik jáne ózge de operasıalarǵa qatysý.
Qarýly Kúshter bul mindetterdi áskerı qurylymdarymen ózara tyǵyz is-qımylda júzege asyrady. Al soǵys ýaqytynda quramyna Qorǵanys mınıstrligine qaraıtyn ásker túrlerinen basqa İshki ister mınıstrliginiń ishki áskerleri, Ulttyq qaýipsizdik komıtetiniń Shekara qyzmeti, Ulttyq ulan, azamattyq jáne aýmaqtyq qorǵanysty basqarý men qurý organdary kiredi.