«Balqash Jylý» JSHS-niń laýazymdy tulǵalary jalpy somasy 677 mln teńge búdjet qarajatyn jymqyrdy degen kúdikke ilindi, dep habarlaıdy almaty-akshamy.kz QR Qarjylyq monıtorıń agenttigi baspasóz qyzmetine silteme jasap.
Agenttiktiń habarlaýynsha, sotqa deıingi tergep-tekserýdi agenttiktiń Qaraǵandy oblysy boıynsha departamenti tirkedi. Belgili bolǵany «Balqash Jylý» JSHS-niń burynǵy basshylyǵy 2020 jyldyń maýsymynan 2023 jyldyń qańtaryna deıingi aralyqta Balqash JEO jáne Balqash qalasynyń jylýmen jabdyqtaý jelilerin jóndeýge jáne kútip ustaýǵa arnalǵan 677 mln teńge kóleminde búdjet qarajatyn jeke shottary men jalǵan kásiporyndardyń shottaryna jiberý arqyly jymqyrǵan.
Atalǵan tulǵalar ustalyp, tergeý ızolátoryna qamaldy. Tergeý sýdıasy eki aı merzimge «qamaý» sharasyn sanksıalady.
«Tergeý jalǵasýda. QR QPK 201-babyna sáıkes ózge de málimetter jarıa etilýge jatpaıdy»,-delingen habarlamada.
QR Konstıtýsıasynyń 77-babynyń 3-tarmaǵynyń 1-tarmaqshasyna jáne QR Qylmystyq-prosestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.