Márıash Dabylhanova 59 jasynda júk kóligin júrgizýdi úırengen, qazir ol júk kóligimen AQSH-ty aralap júr. Otandasymyz ómirin qalaı túbegeıli ózgertkenin jáne ózgeristerden qoryqpaý joldaryn aıtyp berdi, - dep habarlaıdy Almaty-akshamy.kz Massaget.kz-ke silteme jasap.
Márıash Dabylhanova Aqtóbe oblysy, Lenın aýdany, Stepnoe aýylynda dúnıege kelgen. Ol mektepti Mártók aýdanynda támamdap, keıin Jaısań aýylyndaǵy kásiptik-tehnıkalyq ýchılıshede traktorshy mamandyǵy boıynsha bilim alǵan.
«Úsh jyl sovhozda egin egip, shabý, tehnıka jóndeý jumystarymen aınalystym. Men ol kezde 17-18 jasta edim, ári qaraı oqý keregin túsindim. Aýylsharýashylyq tehnıkýmyna túsip, agronom mamandyǵyn aldym», - dep eske alady Márıash Dabylhanova.
Márıash 1983 jyly kúıeýge shyqqan, qazir tórt balasy bar. 90-jyldary otbasy Aqtóbege kóship kelgen. Munda áıel qaıtadan jańa mamandyqty ıgerýge májbúr bolǵan. 5 jyl poshta bólimshesinde, keıin araq-sharap zaýytynda jumys istegen. 2014 jyly Márıash kúıeýimen AQSH-qa qyzyna qonaqqa barǵan. Onyń aıtýynsha, sol kezde alǵash ret ushaqpen ushyp, alǵash ret shetelde bolǵan.
«Men AQSH-qa barýdy armandaǵan joqpyn, bul týraly oılaǵan da emespin. Amerıkaǵa qol jetpeıtindeı kórindi. Týystarymyz bizdi qoldap, qýantty. Biz qyzymyzben Vırdjınıada turdyq. Umytylmastaı boldy, jaı ǵana mádenı shok aldym: aınaladaǵy adamdar sypaıy jáne meıirimdi, kósheler taza, meıramhanalary úlken», - dedi ol.
Márıash Dabylhanova júk kóligin aıdaýdy qalaı úırenip alǵanyn aıtty.
«Men ómir boıy Aqtóbede turdym, óz qalamdy jaqsy kóremin. Biraq AQSH-tan soń ómirim 180 gradýsqa ózgerdi. Munda da kóp eńbek ettim. YouTube arqyly orys tildi júk kóligin júrgizýshilerdi kórip, olardyń jumysynan shabyt aldym. 59 jasymda júk kóligin júrgizýshiler mektebine (júk júrgizýshileri - esk.) oqýǵa tústim, eki aı oqydym. Teorıadan ótip, aǵylshyn tilinde 650 suraqqa daıyndalyp, emtıhandy sátti tapsyrdym. Al praktıkalyq júrgizý kishigirim joldar men federaldyq mańyzy bar tasjoldarda ótti. Qazir men 2019 jylǵy Volvo VNL 860 júk kóligin júrgizemin. Júk kóligi barlyq qajet zattarmen jabdyqtalǵan, mıkrotolqyndy pesh, tońazytqysh, sháınek bar. Men oǵan úı taǵamdaryn jasaımyn, qara shaı ishemin. Al úıdegi taǵamnan jalyqqan kezde, júk kóligi aıaldamalarynda kez kelgen dámhanaǵa baramyn», - dedi ol.
Biir qyzyǵy buǵan deıin Márıash eshqashan kólik júrgizbegen.
«Tilin túsinbesem de, adamdar túsinedi, kómektesedi, men eshqashan jasyma da, elime baılanysty da kemsitkendi sezbedim. Adamdar, kerisinshe, súısinip, qýanady. Munda júk kóligin júrgizetin áıelder jetkilikti. Er adamdar renjitpeıdi. Dóńgelekti aýystyrýǵa quqyǵymyz joq, munda tyıym salynǵan. Jyljymaly jóndeý brıgadasy kelip, jóndeý jumystaryn júrgizedi. Men júk kóliginiń usaq-túıegin jóndeı alamyn, mysaly, maı aýystyra alamyn», - deıdi Márıash Dabylhanova.
Márıash Dabylhanova AQSH-tyń barlyq shtatynda bolǵan. Oǵan Nú-Iorktegi Ortalyq saıabaq, Bostandyq músini qatty unaıdy. Keıipkerimiz ár shtattyń ózindik ereksheligi bar ekenin aıtty. Onyń aıtýynsha, Tehas óte úlken shtat, Vırdjınıanyń tabıǵaty ásem, Arızonanyń qurǵaq aýasy Qazaqstandy eske túsiredi. Márıash jolda úsh aptaǵa jýyq ýaqyt ótkizedi, al bir apta demalady. Qazir jerlesimizdiń tórt balasy, 9 nemeresi bar.