Asta-tók toı jasap, týǵan kúnine 600 myń teńgege tort jasatqan bloger Aselına Batyr kondıterge aqshasyn áli bermegen. Óıtkeni kondıter qoıǵan baǵasy kóńilinen shyqpaǵan. Zańgerdiń aıtýynsha, baǵasy da aldyn ala kelisilmegen kórinedi, - dep habarlaıdy Aqshamnews.kz tilshisi "KTK" telearnasyna silteme jasap.
"Joq, sol kezde de múldem baǵa aıtylǵan joq. Túsinesiz be, múldem aıtylǵan joq. Toı bop jatqan ýaqytta tortty tapsyrdy. Aldyn ala ákelgen joq, 18 shildeden bastap 3 tamyzǵa deıin múldem aıtpady. Ásel birneshe ret surady. Baǵa qansha bolady dep. Óıtkeni mende esep bar, ondaı da bolǵan joq", - deıdi zańger Ǵazıza Ámirbek.
Quraq kórpe tigýmen tanylǵan Aselına Batyr týǵan kúnine tapsyrys bergen táttige aldyn ala 100 myń teńge kóleminde tólem jasaǵan eken. Al naqty baǵasyn bilmegen. Advokat naryqtaǵy somany ǵana beremiz deıdi. Alaıda kondıter Nurshat Aqbergenova tapsyrys berýshiniń bul pikirimen kelispeıdi. Onyń aıtýynsha, barlyq qospasy qymbat, shyǵynnyń bárin óz qaltasynan shyǵarǵan. Jastyq pishindi tortty jep alǵan soń, tutynýshynyń daý shyǵaryp otyrǵanyna renjýli. Salmaǵy 18 keli tartatyn bul jumystyń tym arzan baǵalanǵanyn da qalamaıdy. Taraptar mámilege kele almaǵandyqtan, is sotqa ótti.
"Avtor jumysy ol tapsyrys berýshige ǵana arnap jasalady. Ońaı jumys emes. Mundaı jumys ózge jumystan áldeqaıda qymbat júredi. Senim artyp maǵan tapsyrys bergen soń, shyn júregimmen jasadym. Jumystyń baǵalanbaı qalǵany óte jaman. Onymen qosa, áleýmettik jelige meni balaǵattaǵany úshin de kóńilim qaldy, zań aldynda jaýap bergenin qalaımyn", - deıdi kondıter Nurshat Aqbergenova.