Etnıkalyq qazaqtar negizinen ońtústik oblystarǵa qonystandyrylǵan.
2021 jylǵy 1 maýsymǵa deıin 6 935 adam tarıhı otanymen tabysyp, qandas mártebesin alǵan, dep habarlaıdy Almaty-akshamy.kz QR eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
Jalpy, 1991 jyldan beri respýblıkaǵa 1 mln 77,3 myń etnıkalyq qazaq oralǵan.
Aǵymdaǵy jyldyń basynan beri Qazaqstanǵa kelgen qandastardyń jartysynan kóbi (76,3%) Ózbekstannan, 10,4% – Qytaıdan, 6,2% – Túrikmenstannan, 2,7% – Mońǵolıadan jáne 4,4% - basqa elderden.
Kelgen etnıkalyq qazaqtar negizinen Almaty (30,5%), Túrkistan (15%), Mańǵystaý (17,7%) jáne Jambyl (8%) oblystaryna, sondaı-aq Shymkent (11%) qalasyna qonystandy.
Bıylǵy 1 maýsymdaǵy málimet boıynsha, eńbekke qabiletti jastaǵy etnıkalyq qonys aýdarýshylar sany 56,5%-dy, eńbekke qabiletti jastan kishiler 24%-dy jáne zeınetkerler 19,5%-dy quraıdy.
Eńbekke qabiletti jastaǵy kandıdattardyń ishinen bilim deńgeıi boıynsha 11,3% joǵary bilimdi, 39,5% orta kásibı bilimdi, 45,5% jalpy orta bilimdi jáne 3,7% bilimi joq.