2022 jylǵy 22 jeltoqsanda mobıldi baılanystyń besinshi býyny (5G) úshin radıojıilikterge ashyq aýksıon ótkizildi, dep habarlaıdy Almaty-akshamy.kz Sıfrlyq damý, ınovasıalar jáne aeroǵarysh ónerkásibi mınıstrliginiń baspasóz qyzmetine silteme jasap.
Onlaın saýda "gosreestr.kz" elektrondyq saýda-alańynda uıymdastyryldy. Qatysýshylar 5G tehnologıasyna arnalǵan 3600-3700 MGS (100 MGS) radıojıilik jolaqtary boıynsha básekege tústi.
Aýksıonnyń alǵashqy baǵasy 1 761 225 000 teńgeden bastaldy. Nátıjesinde, radıojıilik jolaqtary úshin saýda-sattyq (aýksıon) barysyndaǵy baǵa 62 669 775 351 teńgege deıin kóterilip, jeńimpaz bolyp "Mobaıl Telekom Servıs" JSHS ("Tele 2" jáne "Altel" brendi) jáne "Ksell" AQ ("Ksell" jáne "Aktıv" brendi) turatyn konsorsıým anyqtaldy.
Joǵaryda atalǵan aýksıonnyń jeńimpazyna respýblıkalyq mańyzy bar qalalarda jáne oblys ortalyqtarynda mobıldi baılanystyń besinshi býynyn (5G/IMT) engizý jáne damytý boıynsha mindettemeler júkteledi.
Mindettemelerge sáıkes, aýksıon jeńimpazy kezeń-kezeńimen jalpy sany 3527 bazalyq stansıany iske qosýy kerek. 2027 jylǵa qaraı respýblıkalyq mańyzy bar qalalardyń 75%-y, oblys ortalyqtarynyń 60%-y 5G tehnologıasymen qamtamasyz etiledi dep kútilýde.
5G jelisiniń negizgi paıdalanýshylary - qarapaıym abonentterden bastap, ınternettiń joǵary jyldamdyǵyn qajet etetin iri bıznes ókilderi bolady.
Al, búgin 5G tehnologıasyna arnalǵan 3700-3800 MGS (100 MGS) radıojıiligi úshin 2 lot boıynsha aýksıon ótkiziledi.