Osy maqsattarǵa búdjetten 83,8 mlrd teńge bólingen.
Qazaqstan Úkimeti jyl basynan beri 592 myńnan astam qazaqstandyqtarǵa áleýmettik kómek kórsetken, dep habarlaıdy Almaty-akshamy.kz
«2022 jylǵy 1 shildedegi jaǵdaı boıynsha, 115,3 myń otbasyndaǵy 592,3 myń adamǵa ataýly áleýmettik kómek taǵaıyndaldy. Bıyl osy maqsattarǵa búdjetten 83,8 mlrd teńge bólindi», - delingen Eńbekmıni baspasóz qyzmetiniń habarlamasynda.
AÁK otbasynyń árbir múshesine jan basyna shaqqandaǵy ortasha tabysy óńirlik eń tómengi kúnkóris deńgeıiniń 70%-ynan tómen azamattarǵa taǵaıyndalady.
Budan basqa, AÁK kórsetýdiń jańa tetigin iske asyrý sheńberinde elimizdiń barlyq óńirinde tabysy az otbasylardyń mektep jasyna deıingi balalaryn kepildik berilgen áleýmettik toptamamen (budan ári – áleýmettik toptama) qamtamasyz etý boıynsha jumys júrgizilýde.
2022 jylǵy 1 shildede AÁK alýshylar qataryndaǵy 1 jastan 6 jasqa deıingi 154,9 myń bala azyq-túlik jáne turmystyq hımıa jıyntyǵy túrinde áleýmettik toptama taǵaıyndaldy.
Esterińizge sala keteıik, bıyl qańtar aıyndaǵy TJ rejımine baılanysty 2021 jyldyń 4 toqsanynda AÁK alǵan azamattarǵa tólemder 2022 jyldyń 1 toqsanyna avtomatty túrde uzartyldy. Bul rette jańa alýshylarǵa elektrondyq úkimet portaly arqyly ataýly áleýmettik kómek taǵaıyndaýǵa ótinish berý múmkindigi berildi.
Qazirgi ýaqytta qazaqstandyqtar AÁK taǵaıyndaýǵa ótinishti turǵylyqty jeri boıynsha jumyspen qamtý ortalyǵynda, sondaı-aq egov.kz elektrondyq úkimet portaly arqyly bere alady.