Qarasaı aýdanyna qarasty Baıtóbe aýylynyń turǵyndary aýyl mańyna jańa Úlken aınalma joly túskeli ábigerge túsken. 6 jolaqty respýblıkalyq tasjolda aýylǵa kiretin jolaıryq salynbaǵan, dep habarlaıdy Almaty-akshamy.kz Almaty.tv-ge silteme jasap.
Almaty oblysyndaǵy 500 otbasy aýyldan shyǵa almaı qalǵan. Olardyń aıtýynsha, úlken tasjol eldi mekendi qaq bólip ótip, Baıtóbege kiretin jol qaldyrmaǵan. Kesirinen turǵyndar baspanasyna taý asyp, batpaq keship jetip júr.
«Balalarymyz 3 mezgil mektepke barady. "BAKAD jabylady" dep biz aralda qaldyq. Ýchaskeni satqan kezde, BAKAD túsedi degen soń, halyq qýanyp alǵan. Ákimdikke aıtsaq, olar bilmeıtinin aıtty. Olar jer satylǵan kezde qalaı bilmegen?! Qujatymyz bar», - dedi aýyl turǵyny Búrkit Baıdaýletov.
«Keleshegimiz balalarymyz ǵoı. Osylar qınalmaı mektebine, balabaqshaǵa baryp kelgenin qalaımyz. Ýáde beredi. Biraq túk te joq», - dedi aýyl turǵyny Malıka Imanqulova.
Al sala mamandarynyń aıtýynsha, 16 eldi mekendi basyp ótetin Úlken Almaty jolynda tek 10 shaqyrymdyq araqashyqtyqta jolaıryq jasalýǵa tıis. Sáıkesinshe, úlkendi-kishili tehnıkaǵa tosqaýyl bolatyndaı qaýip bolmaýy keregin aıtady. Iaǵnı burylysty kez kelgen jerge qoıýǵa bolmaıdy.
«Qala qurylysyn retteýge sáıkes, jergilikti atqarýshy organdar eldimekenderge sheginde jol jıegin salýǵa tıis qarjyny bólý arqyly bekitilgen jobasyn iske asyrýy qajet. Kemertoǵanǵa qarasty Baıtóbe aýylyna keletin bolsaq, bul rette normotıv qujattarǵa sáıkes, 1 A tehnıkalyq avtomobılder sanatyndaǵy joldarmen bir deńgeıde qabysýǵa jol berilmeıdi», - dedi QR Indýstrıa jáne ınfraqurylymdyq damý mınıstrligi avtomobıl joldary komıtetiniń basqarma jetekshisi Jandos Igembaev.
Baıtóbelikter qalaǵa qatynaý qıyndaı túskenine narazy. Jurtshylyq Úlken aınalma joly tolyq qoldanysqa berilse, qazirgi qara joldan da qur qalamyz deıdi.
«Bizdiń mektebimiz mynaý Kemertoǵanda tur. Eger aınalyp barsaq, 15 shaqyrym asyp ketedi. Keptelis taǵy bar. Biz ári qysqa, ári yńǵaıly jol jasap berýin suraımyz», - dedi aýyl turǵyny Ermek Turdaqynov.
Ázirge Baıtóbelikterge aýylǵa kiretin qosymsha jol qurylysynyń aıaqtalýyn kútýden basqa amal joq.
«Biz dereý sheshim qabyldap, aýylǵa kiretin qosymsha joldy qarastyryp berdik. Qazir ol jolaıryq 70 paıyz aıaqtalyp qaldy. Bul jol qurylysyn bıyl sáýirde ótkizýdi josparlap otyr. Ol aıaqtalsa, aýylǵa kirip-shyǵý qıyndyq týdyrmaıdy», - dedi Qarasaı aýdany ákimniń orynbasary Marlen Qasenov.